ইন্দিয়া লৈঙাক্না চত্থরক্লিবা মনিপুরগী প্রোক্সি ৱার ইন্দিয়ানা লেপহন্দ্রিমখৈ লোইবা নাইখিরোই: ধিরেন

হৌখিবা কুমশিং ২০২৩ দগী কুকি মিলিটেন্টশিংবু ইন্দিয়ানা খূৎলায় ওইনা শীজীন্নদুনা মনিপুরদা লেপ্পা নাইদনা প্রোক্সি ৱার অমা চত্থরক্তুনা মীচম মীয়াম পাক্তক্ননা অৱাবা চৈথেঙ মায়োক্নবগা লোয়ননা মমল য়াম্লবা মীওই কয়া পুন্সি পিখম্নহনখ্রে।মীওই লীশীং কয়ামরুম ময়ূম-মকৈ লৈতদুনা ঙসীফাওবা লাঞ্জেন্নহন্দুনা রিলিফ কেম্পশিংদা খুদোংচাদবশিং মায়োক্নরগা লৈরি। পোকপা থা মরি-মঙাখক্তা ঙায়রিবা অঙাঙ অমসুং নূপী কয়া য়াওনা মীচম ৩০০ লোম হেন্না শিহনখ্রে।কুমশিং ২০২৩ দগী হৌজিক ফাওবদা ইন্দিয়ানা মনিপুরবু করম্বা ফীভমদা লৈহল্লিবগে হায়বসি ঐখোয় পূন্না খঙমীন্নবা মথৌ তাই হায়না কোকোমিগী কনভিনর ৱাই কে ধিরেন্না ফোঙদোকখ্রে।

কোকোমিনা শীন্দুনা, হৌজিক মনিপুরদা থোক্লিবা হীঙশা অসী ইন্দিয়ানা লেপহল্লু, সেন্টরনা চত্থরিবা প্রোক্সি ৱার লোইশিল্লু, কুকি মিলিটেন্টশিংগী মথক্তা সেন্টরনা ক্রেকদাওন চত্থদুনা মিলিটেন্টশিং অসী লাকশীল্লু হায়বা ৱাকৎ-মীফমশিং তোঙান তোঙানবা মফমশিংদা চত্থদুনা লাকপগী শরূক অমা ওইনা, ওল ফূম্লৌ অপূনবা মৈরা পায়বী লূপকা খূৎশম্নদূনা ঙরাং ফূম্লৌ কম্যুনিটি হোলদা চত্থখিবা ৱাকৎ মীফম অমদা ধিরেন্না ৱাফমশিং অসী ফোঙদোকখিবনি।

কুকি মিলিটেন্টশিংনা নাগা অমসুং মৈতৈ কম্যুনিটি অনীমক তকথোক্লগা মখোয়গী তোঙানবা লমখৈ অমা য়াৎননবা হোৎনবদা সেন্টরনা মতেঙ পাংশিনবগী ফীভমদু ঙসীদি তশেংনা উবা ফংলক্লে। ইন্দিয়ানা মখোয়গী পোলিসি অমগী মখাদা চত্থরক্লিবা প্রোক্সি ৱার অসী থেংননবা কম্যুনিটি পূম্নমক অমত্তা ওইনা পূন্সীল্লসি, দেমোক্রেটিক ওইবা,অকনবা খোঙজঙ চঙশীল্লসি হায়খি।