ইম্ফালদা শান্তিগী ৱারী শানবদা শরুক য়াখিবা থাদৌ লুচিংবা নেহকাম জোমহাও কুকি- মিলিটেন্ট শিংনা কাপ্তুনা হাৎলম্লে

হন্দক মনিপুরদা থোক্লিবা হীঙশাগী ঈরাং অসী মতম পূম্বগী ওইনা লোইশিন্ননবগী ৱারোয়শিন পুরক্তুনা লমদমশিদা কাঙলূপ মশেল নুংশি-চাননা লৈমিন্ননবা পান্দমদা ইম্ফালদা লাক্তুনা শান্তিগী ৱারী শানবদা শরুক য়াখিবা থাদৌ লিতরেচর সোসাইটি আসামগী চ্যেরমেন নেহকাম জোমহাও (৫৯) বু হৌখিবা আগষ্ট ৩০ গী নুংদাংদা কুকি- মিলিটেন্ট শিংনা তমথীনা ওৎ নৈরবা মতূঙদা নোংমৈনা কাপ্তুনা হাৎলম্লে।

আগষ্ট ৩০ গী নুংদাং পূঙ ৭.৩০ রোম তারকপদা কে আর এ গী কাদরশিংনি চিংনবা কুকি- মিলিটেন্ট শিংনা মতীকচাবা খূৎলায়শিং পায়রদুনা কার্বি আংলোং দিষ্ট্রিক্ট মনূঙচন্না চোংহাং ভিল্লেজ মাঞ্জা দা লৈবা মহাক্কি ময়ূমদা চঙশীল্লক্লগা জোমহাওবু ফাদুনা পুরবা মতূঙ, তমথীনা ওৎ নৈরবা মতূঙদা নোংমৈনা কাপ্তুনা হাৎলম্বনি হায়রি। থৌদোক অসীবু মৈতৈ অমসুং কুকিগী সি এস ও কয়াগা লোয়ননা মীয়াম্না মায়কৈ কয়াদগী য়ানীংদবা ফোঙদোক্নরকখ্রে।

হন্দক চয়োল খরগী মমাঙদা থাদৌ ইনপীগী মীওই ১৭ না শাবা টিম অমা থৌনা ফনা ইম্ফালদা লাক্তুনা হৌজিক থোক্লিবা হীঙশাগী ঈরাং অসী মতম পূম্বগী ওইনা লোইশিন্ননবা অমসুং লমদমসিদা লৈমিন্নরিবা কাঙলূপশিংগী মরক্তা শান্তি পুরক্ননবা মনিপুরগী তম্পাক্তা লৈরিবা সি এস ওশিংগা মীফম পাঙথোক্তুনা ৱারেপ কয়াসু লৌখিবনি। অসীগুম্বা শান্তি অমা পুরক্ননবা হোৎনরম্বা মীওই অমবু তমথীনা হাৎপা হায়বসি টেরোরিজমগী থৌওং অমনি, মখোয়বু কৈদৌনুংদা ঙাকপীফম থোক্তে হায়না মীয়াম্না ফোঙদোক্নরক্লি। আসাম পুলিসনা থৌদোক অসীগী মতাঙদা এফ আই আর লৌখৎখিবগা লোয়ননা মরাল লৈবশিং ফাগৎনবা থিজিনবা হৌখ্রে।