আই দি পিশিংদা সি এম্না ক্রোর ৩২ রোমগী তেঙবাংগী শেনফম য়েন্থোকখ্রে

মনিপুরগী চিফ মিনিষ্টর য়ূম্নাম খেমচান্দনা ঙরাং লাঙ্গোলগী অল্টর্নেটিভ হাওসিং কমপ্লেক্সতগী হায়ব্রিদ মোদতা চুরাচান্দপুর অমদি কাংপোকপিগী রিলিফ কেম্পশিংদা চঙজফম লৌদুনা লৈরিবা ইন্টর্নেল্লি দিসপ্লেস পার্সন্স (আই দি পি) শিংগা ভর্চুএল ওইনা ইন্টরেক্সন অমা পাঙথোক্তুনা, মহাক্কী লৈঙাক অসীনা হৌজিক অৱাবা মায়োক্নদুনা লৈরিবা আই দি পিশিংগীদমক খুন্দা-লৈতাহন্ননবা পায়খৎলিবা থবক-থৌরমশিংগী মরমদা খঙহনখ্রে।

চিফ মিনিষ্টরগা ইম্মোস্নেল এক্সচেঞ্জ তৌনখিবা অদূদা আই দি পিশিংনা মশা-মশাগী মহৌশাগী লৈফমশিংদা হঞ্জিলহনবিয়ু হায়বা ৱাফমশিং পুখত্তুনা চিফ মিনিষ্টরদা হায়জখি। চিফ মিনিষ্টরনসু মহাক্কি অনৌবা লৈঙাক অসীনা আই দি পিশিং অথূবা মতমদা মখোয়গী হান্নগী লৈফমশিংদা হঞ্জিলহন্ননবা নুমিৎ খুদিংগী মকোকথোংবা ওফিসিয়লশিংগী মীফম পাঙথোক্তুনা খন্নরি, য়াম্না থুনা হঞ্জিলহন্ননবা থৌরাং লৈরে হায়না ফোঙদোকখি।সিফাইনা ঙাক্তুনা কয়াম কুইনা লৈগনি, সিফাইনা গার্দ তাদুনা লৈবা হায়বসিদি মতম খরগী এরেঞ্জমেন্ত অমনি, তুং কোইবা য়ারোই।কাঙলূপ অনীগী মরক্তা থম্মোয়গী নুংশিনবগী অচেৎপা মরী লৈরক্লবা মতমদুদা শান্তি পুরকপা ঙমগদৌরিবনি হায়বা ৱাফম চিফ মিনিষ্টরনা ফোঙদোকখি।

দিপুটি চিফ মিনিষ্টর নেমচা কিপগেন, চুরাচান্দপুরগী এম এল এ ওইরিবা এল এম খৌটে, সাইকোৎকি এম এল এ পাউলিয়েনলাল হাওকিপ সু শরুক য়াখিবা থৌরমদুদা চিফ মিনিষ্টরনা লূপা ক্রোর ৩২ হেনবগী শেনফম দিবিটিগী খূত্থাঙদা আই দি পিশিংগী বেঙ্ক একাউন্টশিংদা কাপ্তুনা কান্নবা ফংহনখি। চুরাচান্দপুর অমসুং মোরেদগী লাকখিবা আই দি পিশিংগী ওইনদি মহৌশাগী ময়ূমশিংদা হঞ্জিন্ননবা হোৎনবদা,হৌজিক কম্যুনিটি অনীগী মরক্তা ট্রষ্ট দিফিসিৎ লৈনরিবা মরম্না মতম খরা হেন্না চঙখিগনি হায়না মহাক্না ফোঙদোকখি।