মনিপুরদা হৌজিক ফাওদা মায়োক্নদুনা লাক্লিবা হীঙশাগী ঈরাঙ অসী কাঙলূপ অনীখককি মরক্তা থোকপা ওইরম্বদগী হৌজিক্না কাঙলূপ খরগী মরক্তা থোকপা ওইরক্তুনা হেন্না অরুবা ফিভম অমদা লাকপা উরি।
কাঙলূপ অনী হায়বদি মৈতৈ অমসুং নাগা কাঙলূপশিং হেক উবদা কুকি টেরোরিষ্টশিংনা হাৎপগী থবক কনখৎলক্লি। থৌওং অসী অসূম হেঞ্জিল্লকপদগী হৌজিকতি ঈরাং অসী লাকশীনবদা অরুবা ফীভম অমদা লৈখ্রে হায়না পোলিটিকেল এক্সপার্টশিং, দিমোগ্ৰাফরশিং অমদি সোসিয়েল সাইন্টিষ্টশিংনা মোৎ পীনরক্লি।
চৈরকশিদা, সি আর পি এফ কি কম্মান্দো বট্টালিয়ন ফোর রিজ্যোল্যুট এক্সন (কোব্রা) গী য়ুনিট অনী মনিপুরদা থাজীল্লকখ্রে হায়না মনিপুর লৈঙাক্কি হোম মিনিষ্টর গোবিন্দাস কোন্থৌজম্না ফোঙদোকখ্রে। ইম্ফালগী জেনিম্স হোস্পিটালগী মোর্গতা লৈরিবা নাগা মীচম তরুক্কি হকচাং য়েংশিনবা লাকপদা মিনিষ্টরনা পাউমীশিংদা মহাক্কি ৱাফম অসী ফোঙদোকখিবনি। মনিপুরদা মখা তানা সি আর পি এফকি কোব্রা য়ূনিট অমসু চঙলক্নবা থবক পায়খৎখ্রে হায়না মিনিষ্টর অসীনা পাউমীশিংদা ৱাফম থমখি।