সেন্ট্রেল রিজার্ব পুলিস ফোর্স (সি আর পি এফ) কি ১২০ শুবা বট্টালিয়ন না মনিপুর সিভিল পুলিস পার্সনেলশিংগা খূৎশম্নরগা ঙরাং ইম্ফাল নোংচুপ পানাগী মনূঙচন্না লৈরিবা লমশাং পুলিস ষ্টেসনগী মমাঙ অমসুং অকোয়বা মফমশিংদা লম-তু শেংদোক্তুনা লূ- নান্না লৈনবগী কেম্পেইন অমা চত্থখ্রে।
সেক্যুরিটি পার্সনেল কয়ানা শরুক য়াখিবা থৌরম অদুবু লমশাং মায়কৈগী সধারন মীয়ামগী মায়কৈদগী হরাও তরাম্না অপেনবা অমসুং নুঙাইবা ফোঙদোক্নখি। লৈকায়গী নহারোলশিংসু চঙশীল্লক্তুনা কেম্পেইন অদুদা মতেঙ পাংশিনখি।
থৌরম অদূগা মরী লৈননা হৌগৎলক্লিবা নহারোলশিংদা লূ-নান্না লৈনবগী মতাংদা ৱাখল তাহন্ননবা এৱের্নেস প্রোগ্রাম অমসু পাঙথোকখি। অসীগুম্বা ক্লিনলিনেস দ্রাইব অসী সি আর পি এফনা তোঙান- তোঙানবা মফমশিংদসু মনিপুর পুলিসকা খূৎশম্নদুনা মখাতানা পাঙথোকখিগনি হায়রি।