বি জে পিগী লৈঙাক লাকপদগী মৈ চাং নাইনা মূৎপা হৌরক্লে: মীয়াম

মতম শাংনা মনিপুরদা লোদ সেদ্দিংগী খুদোংচাদবা লৈরকখিদ্রবা মতূঙদা চিফ মিনিষ্টর য়ূম্নাম খেমচান্দগী লৈঙাক অমা লাকখিবদগী ঙসীদি ইলেক্ট্রিককি মৈ চাং নাইনা মূৎপা হৌরক্লে। লোদ সেদ্দিংগী মতম অসী নোংমদা কয়ারক্নো, পূঙ কয়া মূৎকদবনো হায়বা খঙহল্লু হায়না মীয়াম্না মায়কৈ কয়াদগী পেন্দবা ফোঙদোক্নরক্লি।
লোদ সেদ্দিং থম্লে হায়বসু মীয়ামদা ঙসীফাওবা লাউথোকপা লৈত্রি। ফোঙদোক্তবা লোদ সেদ্দিং অমা চল্লাইরি হায়বসি ঈখঙ-খঙনরক্লে। ষ্টেট অসীগী পীক আৱার মতমদা মৈ মেগাৱাট ২০০ রোম মথৌ তাই। মথৌ তারিবা মৈগী চাং অসীগী য়ুনিট অমা ফাওবা ষ্টেটনা পুথোকপা লৈতে। মশাগী জেনরেটর লৈননবসু লৈঙাক অসীনা হোৎনবা লৈত্রি। হৌজিক নোংজুথা মতম ওইবনিনা ঈশীংগী অৱাবা মায়োক্নবসু লৈত্রে। মরম অদূনা হায়দ্রো পৱার প্রোজেক্ট খূদীংমক নীংথীনা মথৌ তৌরিবনি। মৈ জেনরেট ফজনা তৌই। কথালগুরি গ্যাস প্লান্টসু মৈ ফজনা পুথোক্লিবনি। চৈরকশিদা মনিপুর লৈঙাক্না মশাগী কোন্ননবা মৈ লৈবা পামদে। ষ্টেটকি কোন্ননবা মৈ লৈবা হায়বসিদা লৈঙাক্না অচৌবা শেনফম অমা পুথোকপা তারকই।
প্রি-পেইদ মিটর পাল্লে হায়রবসু পান্দবা ময়াম অমা য়াওবনা মৈ হুরাল্লগা শীজিন্নবগী চাংসু ৱাংনা লৈরি। পোলিটিকেল পার্টী অমসু মৈগী টেক্স লূপা ক্রোর অমগী মথক্তা তোন্সিল্লি। মনিপুরদা শাবগী চাং হেঙ্গৎলকপনা ঈমূঙ অয়াম্বদা ইলেক্ট্রিক ফেন,এয়র কন্দিস্নরনচিংবা শীজীন্নরি।
লোদ সেদ্দিং লৈরবসু লৈরে হায়বিয়ু।মূৎকদবা মতমদু মাঙজৌননা খঙহল্লবদি অতোপ্পা পাম্বৈ অমা থিজরবসু য়াই হায়না মীয়াম্না মায়কৈ কয়াদগী ফোঙদোক্নরক্লি।