অঙাং মচীন-মৌপ্ৱা য়াওনা মীওই মঙা হাৎখিবগী ঈরাং কা হেন্না কনখৎলক্লি

চৎলিবা এপ্রিল থা অসীগী তরেৎকি অহীঙ নোংয়াই মতূঙ পূঙ অমা মখায়রোম তারকপা মতমদা বিষ্ণুপুর দিষ্ট্রিক্টকি মনূঙচন্না লৈরিবা ট্রোংলাউবী অৱাং লৈকায়দা লৈবা ঈমূঙ অমদা কুকি মিলিটেন্টশিংনা বোম কাপশীন্দূনা নৌরিবা অঙাং অনী হাৎখিবা অমসুং মখোয়গী অপোকপী মমাবু তমথীনা শোকহনখিবা থৌদোক অমসুং মদূগী মতূঙ তারকপা মীয়ামগী ঈহৌদা সি আর পি এফ না নোংমৈ কাপ্পদা মীওই অহূম লৈখিদবা অদুগা মীওই কয়া শোকহনখিবা থৌদোক অদূবু য়ানীংদবা ফোঙদোক্তুনা চঙশীল্লকপা মীয়ামগী খোঙজঙশিং হেন্না হেন্না কন্সীল্লক্লি।
মসীগী শরুক অমদা, থা অসীগী ১৪ গী নুংদাংদা ইম্ফাল ইষ্ট দিষ্ট্রিক্টকি ওক্সূ নিংথেমচা খুন, নোংদম,নোঙ্গরেন,নোংপোক ককচীংনচিংবা মফম কয়াগী মীয়াম্না মৈরা খোঙচৎ চৎখিবগা লোয়ননা, মীওই মঙা হাৎখিবা থৌদোক অদূবু অকনবা মওংদা য়ানীংদবা ঊত্তুনা খোল্লাউ কয়াসু লাউখি।
ঙরাং ওল কোংবা রোদ য়ুনাইটেদ ক্লব্স ওর্গানাইজেসন না শীন্দুনা, কোংবা কৈথেল ফাওরগা য়াইরিপোক তাবা লম্বীগী শরুকশিংদা মীয়াম্না অথীংবা থমখিবদগী অয়ূক পূঙ ৮ লোম তাবদগী হৌনা লম্বী পরীং অদূদা গারী অমত্তা চেনখিদ্রে, মীয়াম চৎনখিদে, খুন্তাক লান্সিবগী ফীভম উবা ফংখি।ঙসীফাওবা মনিপুর তম্পাক্কি দিষ্ট্রিক্ট পূম্নমক্তা স্কুল -কল্লেজ অমত্তা থোঙ হাংনদ্রি।
ঙরাং ইম্ফাল ইষ্ট দিষ্ট্রিক্টকি খূরায় লম্লোঙ দগী য়াইঙংপোকপী ফাওবগী মরক্তা তোঙান তোঙানবা মফম ১৪ হেনবদা মীয়াম্না সিট-ইন প্রোটেষ্টকি খোঙজঙ চঙশীনখি।
ঙরাং নুমিদাং পূং ৭ তাবা মতমদসু অমুকো, অমৱোভা, কোহর, এম এস এফ অমদি পোইরৈ লৈমরোল মৈরা পায়বী অপূনবা লূপ্না শীন্দুনা ক্বাককৈথেলদগী নাগামপাল ফাওবা মীয়ামগী মৈরা খোঙচৎ অমসু চত্থখি।