অনৌবা মনিপুর লৈঙাক্তা অৱাৎপা মিনিষ্টরশিং হাপচীন্দুনা চাউথোকহন্ননবা চিফ মিনিষ্টর দিল্লি পাংখ্রে

চৎলিবা ফেব্রুয়ারি থা অসীগী মরিদা মনিপুরগী চিফ মিনিষ্টর ওইনা ৱাশক লৌখিবা য়ূম্নাম খেমচান্দগী মিনিষ্ট্রিদা অতৈ কেবিনেট মিনিষ্টর মরিসু নুমিৎ অদুদা ৱাশক লৌদুনা পূন্না মিনিষ্টর মঙা লৈখ্রবা মতূঙদা নুমিৎ কয়ানিরোম অৱাৎপা মিনিষ্টর তরেৎ হাপচিন্দুনা চাউথোকহনবা ঙমদনা লৈরকখ্রবা মতূঙদা চৎলিবা থা অসীগী ২১ গী নুমিৎ য়ুংবা মতূঙদা চিফ মিনিষ্টর অসি দিল্লিগীদমক ইম্ফাল থাদোকখ্রে।
মহাক্কি দিল্লি খোঙচৎ অসি মনিপুরগী অনৌবা লৈঙাক অসীদা অৱাৎপা মিনিষ্টর তরেৎ অদূ হাপচিন্দুনা মীয়াম অমসুং ষ্টেট অসীগী চাওখৎ-থৌরাংগা মরী লৈনবা থবকশিং মপূঙফানা পায়খত্তুনা ঈং-তপ্পা, চাওখৎপা ষ্টেট অমা ওইহন্নবনি হায়রি।চিফ মিনিষ্টরগী দিল্লি খোঙচৎ অসী গুরুগ্ৰামদা লৈরিবা মেদান্টা-দি মেদিসিটিদা লায়েংদুনা লৈরকখিবা থানলোন কেন্দ্রগী এম এল এ ভুংজাগিন বাল্টেগী অনাবগী ফীভম লুশিল্লক্তুনা লৈখিদ্রে হায়বা ৱাফম অমা থোক্লকপদগী নোংমা য়ৈথোক্লুরবনি। অদূম ওইনমক বেল্টে হিংলি, অনাবগী ফীভম খরা লুনা লৈবগী ৱাখক্তনি হায়বা ৱাফম অমা অমুক নৌনা ফোঙদোক্নরকপদগী দিল্লিদা হৌখিবা থাংজা নুমীৎ অদূমক্তদা, হান্না লেপখিবা সেদ্যুল্ড দা দিল্লি পাংখিবনি।
চৈরকশিদা থানলোনগী এম এল এ ভুংজাগিন বাল্টেসু চিফ মিনিষ্টরনা ইম্ফাল থাদোক্লমদাইগী মীকূপতুদা লৈখিদবনি। মহাক্কি হন্দক্কি দিল্লি খোঙচৎ অসিদা য়ুনিয়ন হোম মিনিষ্টর অমিট শাহ, দিফেন্স মিনিষ্টর রাজনাথ সিংহ অমদি অতৈ লুচিংবশিংসু উনদুনা ৱারী শান্নগনি হায়রি।চিফ মিনিষ্টরগী খোঙচৎ অসীদা ময়াঙ ইম্ফাল কেন্দ্রগী এম এল এ টি রোবিন্দ্রোসু লোয়নখি।