ঙরাং নুমিদাংৱাইরম পূং ৫:৩০ রোম তারকপদা ককচীং দিষ্ট্রিক্ট কি মনূং চন্না লৈবা কুনুতা চীংজীন মনাক্তা গারী অহুম থেংজিন্নবদা মীওই অহুম শোক্তুনা লায়কন্নখ্রে। থৌদোক অদু ককচীং পুলিস ষ্টেসন গী মনুং চন্না লৈবা, নেস্নেল হায়ৱে ১০২, ইম্ফাল -মোরে লম্বীদা থোকখিবনি। শোক্লবা মীওই অহুম্মক জিবন হোস্পিটাল, ককচীংদা পুখত্তুনা লায়কন্নখি।
অশোকপশিং অদুদি নাউরেম সান্তা (৪১) অপোকপা নাউরেম অচাংয়াইমা, ককচীং ৱাইরি সেনাপটি লৈকায়; খাইদেম চৌরজিৎ (৩৪) অপোকপা লৈখিদ্রবা দেবদট্ট, তাংজেং খূনৌ অমসুং মোহম্মদ হাসন (৩৪) অপোকপা মোহম্মদ অহম্মদ আলি, সোরা অৱাং লৈকায়নি। নাউরেম সান্তনা বোলেরো কার রেজিষ্ট্রেসন নম্বর এম এন ০৪এ ৯৩৯৯ অসী থৌরগা ককচীং লমখায় মায়কৈরোমদগী ইম্ফাল লোমদা লাকপনি।
খাইদেম চৌরজিৎনা বোলেরো রেজিষ্ট্রেসন নম্বর এম এন ০৪এ ৫১১৯, মোহম্মদ হাসন্না এ ষ্টার কার রেজিষ্ট্রেসন নম্বর এম এন ০৩এ ৭২০৪ অসী থৌরগা লাকপদা মথং মথং থোমজিন্নখিবনি। নাউরেম সান্তদি শীজ হোস্পিটালদা মখা তানা রিফর তৌখ্রে হায়রি। ককচীং পুলিসনা থৌদোক অসীগী মতাঙদা কেস অমা রেজিষ্টর তৌখ্রে।