মনিপুর পরীংগী ইন্দো-ম্যান্মার বোর্দর মনাক্তা লৈরিবা চোরো ভিল্লেজদা ইন্দিয়া রিজার্ব বট্টালিয়ন কম্পেনি অমা অথূবা মতমদা দিপ্লোই তৌগদৌরি। হীঙশাগী ঈরাং য়াম্না কল্লিবা ঊখ্রূল অমসুং কামজোং দিষ্ট্রিক্ট শিংদা মহৌশাগী শক্তম হঞ্জিলহন্নবা পান্দমদা লৈঙাক্না খোঙথাং অসী লৌখৎলকপনি।
চহী অসীগী মে ৭ তা ম্যান্মার ঙমখৈগী মনাক্তা লৈরিবা মনিপুরগী ৱাংলি, চোরো, আলোয়ো অমসুং নম্লি খুঙ্গংশিংদা, ম্যান্মারদা বেজ তৌবা কুকি লালহৌবনি চিংনবশিংনা এত্তেক চত্থরকপদা য়ূম কয়ামরূম মৈ থাদোক্লম্বদগী হৌজিক ফাওবদা খুঞ্জাশিং লাঞ্জেন্নদুনা রিলিফ কেম্পশিংদা চঙজফম লৌদুনা লৈরক্লিবনি। হন্দক নুমিৎ খরনিগী মমাঙদসু পিলোংদা এত্তেক তৌরকখিবদা মপা-মচা য়াওনা মীওই ৪ হাৎলমখিবগী থৌদোক লৈখ্রবনি।
জেট চোরো ভিল্লেজগী চিফ না ফোঙদোরকপা মতূং ইন্না, খুঞ্জাশিংনা লৈঙাক্তা হায়জখিবগী মতূঙ ইন্না খোঙথাং অসী লৌখৎলকপনি। ঙরাং অহানবা ওইনা আই আর বি পার্সনেল ২৫ থুংলরে হায়খি। আসাম রাইফল্সকি আউটপোষ্ট অমসু মফম অদুদা হান্নদগী লৈরক্লি হায়না চিফ অসীনা মখা তাখি।