মর্জর এগ্ৰিমেন্ট গী মায়োক্তা কৌখিবা টুটেল সটদাওন্না মহৌশাগী পুন্সিদা চাউনা অকায়বা পীখ্রে

কুমশিং ১৯৪৯ গী ঙসীগী নুমিৎ, সেপ্তেম্বর ২১ অসিদা ইন্দিয়া লৈঙাক্না মনিপুরগী মতমদুগী নিংথৌ বোধচন্দ্রবু শিল্লোংদা কৌরগা হাওস এরেষ্ট তৌদুনা থম্লবা মতূঙদা নমদূনা খূৎয়েক পীহন্দুনা মনিপুরবু ইন্দিয়াগী ফীবান্নুংদা চলহনখিবা নুমিৎ অদূবু কন্না য়ানীংদবা ফোঙদোক্তুনা য়াওল্লূপ অমনা কৌখিবা মনিপুর পূম্বগী বন্দ মনূঙদা তম্পাক্কি মফম পূম্নমক্তা খুন্তাক-লান্সিবগী শক্তম মীয়াম্না উবা ফংখ্রে।

চহী লীশীং অহুম হেনবগী মনীংতম্বা নিংথৌ পানবা লৈবাক অমা ওইবগী পুৱারি লৈজরকখিবা, মীখা পোনবা হৈনরকখিদ্রবা মনিপুরিশিংগী ইজ্জৎ লৈখা তাহন্দুনা অমদি অথৌবা ঈপা-ঈপূশিংগী থৱায়না পোন্থা ওইদুনা ঙাক্লকখিবা মনিপুরগী পাক-চাউরবা এরিয়া অমগা কোন্ননা ঐখোয়গী লৈজবা পূম্নমক ইন্দিয়াদা সরেন্দর তৌহনখিবা নুমিৎ অদূবু নীংশীংদুনা অমসুং য়ানীংদবা উত্তুনা কৌখিবা বন্দ অমা ওইবা মরম্না মীয়াম্না মপূঙফানা শৌগৎনরকখি।

কুমশিং ১৯৪৯ গী সেপ্তেম্বর ২১ দা খূৎয়েক পীহনখিবা মর্জর এগ্ৰিমেন্ট অদূগী মায়োক্তা ঙসীফাওবা মনিপুরগী মীয়াম্না অকনবা প্রোটেষ্ট কয়া কয়া চত্থদুনা লাক্লিবনি। মসীনা মরম ওইদুনা এন আর এফ এমনা কৌখিবা পূং ২৪ গী জেনরেল ষ্ট্রাইক অসীবু মপূঙ ফানা শৌগৎনখিবনি। লম্বীদা গারিশিং চৎনখিদে, কৈথেলশিং থোঙ হাংখিদে, লৈঙাক্কি লোয়শঙ অয়াম্বা থোঙ থিংখি । লোয়শঙ খরদি এমপ্লোয়িগী মশীং য়াম্না হন্থনা লাক্নখি, স্কুল-কোল্লেজ পূম্নমক থোঙ হাংনখিদে। খ্বাইরম্বন্দ কৈথেলগী এরিয়াদা তূমিৎ-কাঙ ফাওবা পাইখিদ্রে হায়বা য়াই।

লৈঙাক্কি মায়কৈদগী তোঙান তোঙানবা মফমশিংদা সেক্যুরিটি পার্সনেলশিং চাইথোক্তুনা দিপ্লোই তৌখি। খ্বাইদগী মপূঙ ফাবা বন্দ অমগী শক্তম উবা ফংখি। রেকোর্দ ওইনা মীয়াম্না খ্বাইদগী মপূঙফানা শৌগৎখিবা বন্দ হায়বদু ওইখি।