মনিপুর সেন্ত্রেল জেলগী অহানবা রাইজিং দে থৌরম পাঙথোকখ্রে

অৱাং নোংপোক ইন্দিয়াদা খ্বাইদগী লিরবা জেলশিংগী মনূঙদা অমা ওইনা ইম্ফালদা লৈরিবা মনিপুর সেন্ত্রেল জেলগী পুৱারিদা ইহান-হানবা ওইনা মসীগী রাইজিং দে থৌরম ঙরাং চিফ মিনিষ্টর য়ূম্নাম খেমচান্দ সিংহনা অথোয়বা মীথূঙলেন ওইনা শরূক য়ারদুনা পাঙথোকখ্রে।
চহী ১৩৪ শুরক্লবা জেল অসীগী রাইজিং দেগী থৌরম হৌখিবা চহীশিংদা অমুক ফাওবা পাঙথোকখিদ্রিবনি, ঙরাংগী অদুনা অহানবা ওইরি। মনিপুর লৈঙাক্কি হোম মিনিষ্টর গোবিন্দাস কোন্থৌজম্না চ্যের লৌদুনা পাঙথোকখিবা থৌরমদুদা চিফ মিনিষ্টরনা হায়, চাওখৎলবা ঙসীগী মালেম অসিদা জেলগী থবক-থৌরমশিংদসু অহোংবা কয়া লাক্লে। জেলদবু লৈরবদি মরাল লৈরবনি হায়না লৌনরম্বা মতমদু হৌজিক্তি মতমগা চূনদ্রবা ৱাখল্লোন অমা ওইরে। কোর্টনা ৱায়েল চত্থদুনা জজমেন্ট পীরবা মতমদা মরাল লৈতে হায়দুনা থাদোকখি বন্দি কয়ামরুম য়াওরি। মরম অসীনা কোর্টকি জজমেন্ট ফংদ্রিফাওবা জেলদা লৈরিবা মীওই অমবু ঐখোয়না মরাল লৈরবনি হায়না লৌবা য়ারোই।জেল হায়বসি হেঞ্জিল্লুরবা, কায়থরুরবা লমচৎ-শাজৎ শেমদোকচদুনা, মতূঙগী পুন্সিদা অচূম্বা লম্বীদা ঈশানা ঈশাবু লমজীংজবগী মথক্তা অতৈ মীওই কয়াগী অরানবা খোঙথাঙশিং শেমদোকহন্নবগী রিফোর্মেসন সেন্টর অমনি হায়খি।
অমরোমদনা, জেল হায়বসি আইনগী অচূম্বা ফংননবা শেম্বা পোত্থাশঙনি হায়খি।
চিফ মিনিষ্টরনা মখা তানা হায়, মনিপুর লৈঙাক্কি প্রিজন্স এন্দ করেক্সনেল দিপার্টমেন্ট না শীন্দুনা মনিপুর সেন্ট্রেল জেলগী অহানবা রাইজিং দে থৌরম পাঙথোকপা অসী পূক্নিং থৌগৎনিঙায়নি। জেল অসীগী ৱাৎলিবা মেনপাৱর, ইক্বিপমেন্ত, ইনফ্রাষ্ট্রকচর পূম্নমক মেন্সিল্লগনি। ৱাৎলিবা ষ্টাফশিংগী লিষ্ট অমা পীখৎলক্নবা চিফ মিনিষ্টরনা মরী লৈনবশিংদা পাউতাক পীখি।