মনিপুরগী হৌজিক ওইরক্লিবা ফীভম অসী য়াম্না মরা তাদবা, মীকূপ অমদা মচেৎ কয়া থোক্না কায়খিবা য়াবগী থাক অমদা লৈরক্লে। কুকি-নার্কো টেরোরিষ্টশিংগী মায়কৈদা ইন্দিয়া লৈঙাক্না শৌগৎলগা লমদমসিগী য়েলহৌমীশিং, জিওগ্ৰাফিকেল ইন্টিগ্ৰিটি অমদি য়ুনিটি অসী মচেৎ কয়া থোক্না থুগাইদুনা মাঙহন্ননবা থৌরাং তৌরক্লে হায়বসি ঐখোয় পূম্নমক্না খঙনরবা অমনি। মসীবু থেংনবা ঙমগদবা, মমালৈবাক-মরমদম নুংশিবা, মনিপুরগী অপূনবা শক্তম ঙাক্নবগীদমক থৱায় ফাওবা থাদোকপা ঙমগদবা অনৌবা নহারোলশিং হন্দক্কি এসেমব্লি মীখলদা মায় পাকহল্লসি হায়না ফাউন্দেসন ফোর রুরেল অর্বান দিবেলপমেন্ত কি প্রসিদেন্ট এল তোম্বনা ফোঙদোরক্লি।
পাউমীশিংগা অখন্ননা উনখিবা পাউগী মীফম অমদা সোসিয়েল এক্টিভিষ্ট অসীনা হায়, চহী কয়াগী মতমদগী ঙসী ফাওবদা ইম্ফাল-জিরিবাম লম্বী অসী মনিপুরদা সাসন তৌদুনা লাকখিবা কংগ্ৰেস অমসুং বি জে পিগী লৈঙাকশিংনা মপূঙফানা শেমজীনবা ঙমদনা লাক্লি। ইম্ফাল-দিমাপুর লম্বী অমসুং ইম্ফাল-জিরিবাম লম্বীদা মনিপুরগী মীয়াম্না পূক্নীং ৱাখল লৈতানা গারী তোংদুনা চৎপা ঙমহন্দ্রি। লম্বী নীংথীনা শেম্বিদবা, অদুগা নাকল অমরোমদনা খূৎলাই পায়বা চীঙগী লালহৌবশিংনা পোৎ-চৈ মুনবা, দ্রাইভরশিং, পেসেঞ্জর অমদি হেন্দিমেনশিংদা ওৎ-নৈবা, ফূবা-চৈবা, কিহনবা, কিদনেপ তৌরবা মতূঙদা হাৎপনচিংবা থৌদোকশিং য়াম্না তোয়না থোক্লি।
চৈরকশিদা মশাগী ওইজবখক খনবা এম এল এ, মিনিষ্টরশিংগী মরক্তগী রাজনিটি দল অমদগী অতোপ্পা দল অমদা চোংথোক-চোংশিন তৌনদুনা লৈরিবা অসী লাইবক থীবনি হায়খি। মখোয়শিং অসীনা ঈমালৈবাক অসীগীদমক লিংজেল মান্ননা চঙশীনমিন্নরবদি মনিপুরগী অপূনবা শক্তমদা কনামত্তনা শীঙনরকপা ঙম্লোইদবনি হায়না তোম্বনা ফোঙদোরক্লি।