জে এফ দিগী জেনরেল ষ্টাইকনা মনিপুর তম্পাক্তা চাউনা অকায়বা পীখ্রে, কম্মান্দোনা জীতেন্দ্র ফাননবা হোৎনরম্লে

হৌখিবা আগষ্ট ৩১ গী অহীঙ নোংয়াইদগী সেপ্তেম্বর ১ গী অহীঙ নোংয়াই ফাওবা কেম্পেন ফোর জষ্ট এন্দ ফ্যের দিলিমিটেসন (জে এফ দি) না কৌখিবা পূঙ ২৪ গী জেনরেল ষ্ট্রাইক অদূনা মনিপুর মীয়ামগী মহৌশাগী পুন্সিদা চাউনা অকায়বা পীখ্রে। নাকল অমরোমদা, জে এফ দিগী কনভিনর ওইনা লৈরিবা জীতেন্দ্র নিঙোম্বা ফাননবা তান্নরকখিবা মনিপুর পুলিসকী কম্মান্দো টিম অমা, মৈরা পায়বী ঈমাশিংনা থত্তুনা অকনবা মওংদা মূকখায়নবদগী জীতেন্দ্র নান্থোকপা ঙমহৌরে।

পূঙ ২৪ গী জেনরেল ষ্ট্রাইক অদূ জে এফ দিনা মীয়ামগা খূৎশম্নদুনা কৌখিবনি। ষ্ট্রাইক শৌগৎপা মীয়াম্না লম্বীদা থোক্নরক্তুনা উ-ৱা ফৈজিন্দুনা অচৎ-অওকশিং থিংখি। লম্বী ময়ায়দা তয়ারনচিংবা মৈ থাখি। স্কুল-কোল্লেজ থিংখি। কৈথেল ফম্নখিদে, লৈঙাক্কি লোয়শঙশিংদা থবক তৌবা এমপ্লোয়িশিং ওফিসতা লাকপগী মশীং কা হেন্না হন্থনা লৈখি। বিজিনেস ইষ্টাব্লিসমেন্ট, দুকান্নচিংবা ঙম্নমক থোঙ হাংনখিদে। লৈকায়দা লৈবা পান দুকানশিং ফাওবা অয়াম্বা থোঙ হাংনখিদে। জেনরেল ষ্টাইক অদুনা মনিপুর তম্পাক্তা খুন্তাক-লান্সিবা ফীভম অমা ওইহনখি। চীঙগী দিষ্ট্রিক্টশিংদদি ষ্ট্রাইক অদূগী চৈথেং কা হেন্না মায়োক্নবা লৈখিদে হায়বগী পাউ লৈরি।

হৌখিবা আগষ্ট ৩১ গী নুংদাং পূং ১০ রোম খরা হেল্লকপা মতমদা জে এফ দিগী কনভিনর ওইনা লৈরিবা জীতেন্দ্র নিঙোম্বনা মমান্নবা অমগা লোয়ননা গারি মচা অমদা পূন্না তোংদুনা লাকখিবগী লম্বীদা কোনুং মমাঙদা খামদুনা লৈরম্বা মনিপুর পুলিস কম্মান্দোগী বুল্লেট প্রূফ রক্সক অমনা য়াম্না কন্না তান্নরকখি অদুবু লম্বীদা লৈরম্বা মৈরা পায়বী ঈমাশিংনা থৌদোক অদু থেংনবদগী মৈরা পায়বীশিংনা কম্মান্দো গী গারিদু থত্তুনা মূক্নবদগী জীতেন্দ্র শম্নাদা নান্থোকহৌখি হায়রি। নম্বর থাদবা গারি অমা চৎখিবা উহৌবদগী মদূবু তান্নরকপনি হায়না কম্মান্দোশিং অদুনা মৈরা পায়বী ইমাশিং অদুদা ফোঙদোক্লমখি হায়রি।