মনিপুরগী হোইম মিনিস্তর গোবিন্দাস কোন্থৌজমনা নোংমাইজিং নুমিত্তা হায়খি, রাজ্য মনুংদা লৈরিবা নেস্নেল হাইৱেশিংদা কফোই লৌবা থিংনবগীদমক মনিপুর পুলিস কমান্দো অমুক হন্না থাজনবা সরকারনা খন্নরি। মহাক্না পাওমীশিংদা ৱা ঙাংলাদুনা হায়খি, মমাংদসু রোদ ওপনিং পেত্রোল দুতিগীদমক স্তেত পুলিস কমান্দোশিং হাইৱেশিংদা থাজরম্মী, অদুবু হৌজিক মীশিং ৱাৎপগী অবাবা লৈরবসু মখোয়বু অমুক হন্না থাজবনা কফোই লৌবা চাং চাউনা হন্থহনবা ঙমগনি।
স্তেত অসিগী মরুওইবা হাইৱে অনী — ইম্ফাল অমসুং শিলচর শম্নহনবা NH-37, অমসুং ইম্ফাল অমসুং দিমাপুর শম্নহনবা NH-2 দা মরুওইবা পোৎ-চৈ অমসুং থাউ পুরিবা গাড়ীশিংদা কফোই লৌবগী থৌদোকশিং হেনগৎলকপগী মনুংদা মিনিস্তরগী ৱাফম অসি লাকপনি। সরকারনা কমান্দোশিং অমুক হন্না থাজদুনা হাইৱেশিংদা লম্বী-থোং ঙাক-শেনবা অমসুং গাড়ী-কাংবুশিংদা চত্থ-থোক স্মুথ ওইনা লৈহনবা পাম্লি।