লমদম অসিগী লাইরিক-লাইশু হৈরবা থবক ফংদ্রিবা নহারোল কয়াদা মশানা মশাবু থবক পীজবগী অনৌবা ইন্নোভেটিব ওইবা য়ূম-কৈ শাবগী মচাকশিং পুথোক্তুনা থবক পীরিবা, ইম্ফাল ইষ্ট ডিষ্ট্রিক্ট মনূঙচন্না খোমিদোক শোরোক মপান্দা লৈরিবা উম্মা সিগনোগ্ৰাফিক কম্পেনিগী নৌনা থুংলরবা মেছিন্নরিশিং মীয়ামদা ঊৎপগী থৌরম অমা ঙরাং নুংথিল উম্মা ফেক্তরিগী কমপ্লেক্সতা পাঙথোকখিবগা লোয়ননা মুস্লিম ক্লারিকশিংসু শরুক য়ারদুনা মেছিন্নরি অমদি ইক্বিপমেন্টশিং অদূগী মায়খূম হাংদোকখ্রে।
মেছিন্নরিশিং অদূ খূৎলোয়রবা মেকানিক অমদি ৱার্করশিংনা শীজীন্নদুনা হান্নদগী হেন্না মতীক-মগুন লৈরবা এল্লুমিনিয়ম, ষ্টিলনচিংবগী য়ূম, বিল্ডিংনচিংবগী ইন্টরিয়র আইতেমশিং, থোঙ-থোঙনাও, ষ্টিয়র রেল্লিং, ৱাল আইতেমশিং অমদি দেকোরেসনগী ফ্রেম্নচিংবা মতমগা চাননা পুথোকপা ঙম্লগনি হায়না উম্মা সিগনোগ্ৰাফিক কম্পেনি অসীগী প্রোপ্রাইটর অমসুং মেনেজিং দিরেক্টর মোহম্মদ সাজবম বহাউদ্দিন্না ফোঙদোকখি।
উম্মা কম্পেনি অসীনা হৌজিক ফাওবদা লাইরিক-লাইশু হৈরবা, থবক ফংদ্রিবা নহারোল ১০০ হেনবদা য়ূম-কৈ, অৱাংবা বিল্ডিং শাবগা মরী লৈননা খূৎ-শা হৈবগী ট্রেনিং লেম্না পীদুনা মশানা মশাগী শেন্থোক লৈহনবা ঙমখ্রবনি। হৌজিক হৌজিকসু কম্পেনি অসীদা নহারোল ৫০ হেন্না থবক পীদুনা শেন্থোক লম্বী পীরি।