চপ মান্নবা শিনফম অমদা মতৌ তম্নরকপা অসীনা খুদোংচাদবা কয়ামরুম মায়োক্নরি: গোবিন্দাস

নিপুরদা মহৌশাদগী হৌনা ঐখোয়গী মীয়াম অসীগী মরক্তা ফত্তবা হৈনবি লীচৎ অমা শাগোন্নদুনা লাক্লি। মদূ অতৈ অমা নত্তে, কনাগুম্বা মীওই অমনা অনৌবা শিনফম নত্রগা বিজিনেস অমা হৌদোকচরকপা মতমদা, অতৈ কনাগূম্বা মীওইশিংনা মদুদগী তোঙানবা, মান্নদবা শিনফম নত্রগা বিজিনেস অমা হৌদোক্নবা হোৎনবগী মহূত্তা, অহানবা মীওই অদুনা পায়খৎপা হৌখ্রবা বিজিনেস অদুগা চপ মান্নবশিং হৌদোক্নরক্তুনা মতৌ তম্নরকপা অসীনি। মসীদি য়াম্না অপঙবা, থম্মোয় পীকপা, মী অমনা ঈনাক খুনখিগদৌরে, শেল-থুম য়াম্না পায়খিগদৌরে হায়না কল্লক্তুনা ঐখোয় মশেল চিংথনবা হোৎনবগী, য়াম্না থম্মোয় শোঞ্জবা, মী মচাগী থৌওংনি হায়না মনিপুরগী হোম অমসুং য়াসকি মিনিষ্টর গোবিন্দাস কোন্থৌজম্না ফোঙদোকখ্রে।
ঙরাং সেল্ফ এমপ্লোয়মেন্ট দীজল ওটো, ঈ-রিক্সো অমদি টাটা মেজিক এসোসিয়েসন, নিংথৌখোং টু মোইরাংগী ১৬ শুবা ফাউন্দেসন দে থৌরমদা অথোয়বা মীথুংলেন ওইনা শরূক য়াখিবা মিনিষ্টরনা ৱাফম অসী ফোঙদোকখিবনি।
বিষ্ণুপুর দিষ্ট্রিক্টকি মনূঙচন্না লৈরিবা ফূবালা মখা মমাঙ লৈকায় ৱার্দ নম্বর ফোরগী কম্যুনিটি হোলদা পাঙথোকখিবা থৌরমদুদা মোইরাং কেন্দ্রগী এম এল এ থোঙাম শান্তি, সেল্ফ এমপ্লোয়মেন্ট দীজল ওটো, ঈ-রিক্সো এন্দ টাটা মেজিক এসোসিয়েসনগী প্রেসিদেন্ট পুখ্রম্বম প্রবিন, দিষ্ট্রিক্ট ট্রান্সপোর্ট ওফিসার খূমুজম জিমিনাসু শরূক য়াখি।
চপ মান্নবা শিনফম ঙাক্তদা থবক তৌমিন্নরবদি শিনফম মুন্নরক্তুনা ঐখোয় মশেল পুল্লপ অৱাবা ঈপাক্তা লূপমীন্নবা তাবনি। মী অমনা কান্নবা ফংখিগদৌরে, ঈনাক কৈরাক খুনখিগদৌরে হায়রবদি মদুদা শৌগৎনবা চপ মান্ননা হোৎনমিন্নসি, চিংথনবা ৱাখল থাদোকসি হায়না মিনিষ্টরনা ফোঙদোকখি।