কাংপোকপিদা মীয়ামগী তঙায়ফদনা চঙদবা য়াদ্রবা অচা-অথককি পোৎলমশিং, হীদাক-লাংথক্নচিংবা ফংলক্তবদগী হ্যুমেনিটারিয়ান ক্রাইসিস মায়োক্নরে। মরম অসিনা সেন্টর অমসুং ষ্টেট লৈঙাক্না মীয়ামগী চান্ন-থক্নবা চীঞ্জাক অমদি অনা-অয়েক্কা মরী লৈনবা হীদাক-লাংথক্কি পোৎলমশিং খূদক্তা ফংহনবিয়ু হায়দুনা অল্টিমেটম পীখিবা অমগী মতূঙ তারকপদা চৎলিবা থা অসীগী ২৮ গী নুংদাংদা সেক্যুরিটি ফোর্সনা ঙাক-শেন্দুনা ইম্ফাল-তমেঙলোং রোদতা কাংপোকপী তম্না চান্ন-থক্নবা অমদি হীদাক-লাংথককি পোৎলমশিং পুরকপদা নাগা প্রোটেষ্টরশিংগা য়াম্না চাউনা মূক্নখ্রে।
সেক্যুরিটি ফোর্সনা লম্বী থিংলিবশিং অদূ তান্থোক্নবা হোৎনবদা মোক বোম অমসুং টিয়র গ্যাস কাপ্পদা অশোক-অপন কয়াসু য়াওখ্রে। তোঙান তোঙানবা ট্রক ২৮ দা পুরকখিবা পোৎলমশিং অদু লিয়াংমাই নাগাশিংনা খুন্দাবা চৱাংকিনিং ভিল্লেজদা মীয়াম্না থত্তুনা থমখি।
মফম অদূ কিলোমিটর ১৪ রোম কাংপোকপি দিষ্ট্রিক্ট হেদক্বার্টরদগী লাপ্না লৈবনি। মীয়ামদু নমখায়রম্লগা সেক্যুরিটি ফোর্স টিম অদূ মখাতানা লাকখি। খোংলাং অতোংবা ভিল্লেজদা নাগা মীয়াম্না গারিশিংদু অমূক হন্না থত্তুনা থমখি। লম্বীদা য়োৎপী য়ুংদুনা সেক্যুরিটিগী গারি মঙা হেন্না পঙ্কচর ওইহনখি।ৱারী শান্নরবসু য়ান্নবা পুরকপা ঙমদবদগী নুমিদাং পূং ১০:৩০ রোম তারকপদা সেক্যুরিটি ফোর্সনা স্মোক বোম, টিয়র গ্যাসনচিংবা কাপতুনা মীয়ামদু তানখায়রবা মতূঙদা কাংপোকপি তম্না চঙশীনবা ঙমখি হায়রি।
