লৈঙাক্না লানবাউ পীননবা হোৎনরক্কনু, এটি গী থৌমীশিং খূদক্তা থাদোরক্কদবনি: কৈথেল ফম্বীশিং

নেস্নেল ইনভেষ্টিগেসন এজেন্সি এন আই এনা হন্দক অরম্বাই তেঙ্গোলগী থৌমী অহুম ফাজীনখিবা অদূ মরম চাদে, কন্দিসন অমত্তা থমদনা লৈঙাক্না মখোয়বু খূদক্তা থাদোরক্কদবনি। করিগুম্বা থাদোরক্তবা তারবদি মীয়ামগী লান অমা হৌরক্নবা সেন্তর অমসুং ষ্টেট লৈঙাক্না লানগী পাউজেল মীয়ামদা পীবনি  লৌগনি হায়না খ্বাইরম্বন্দ কৈথেলদা পোৎফম ফম্লিবী ঈমাশিংনা অকনবা ৱাফম থমখ্রে। ঙরাং খ্বাইরম্বন্দ কৈথেল মরিদা পোৎফম ফম্লিবি ইমাশিংনা মফম অদূদা অপূনবা ৱাকৎ মীফম অমা ফমদুনা, লৈঙাক্না ফাজীনখিবা অরম্বাই তেঙ্গোলগী থৌমী অহুম থাদোরক্নবা দিমান্দ তৌখিবা অমদা ৱাফম অসী ফোঙদোকখিবনি।

অরম্বাই তেঙ্গোলগী থৌমী অমত্তা ফাজীনবা য়ারোই, খুল ঙাকপশিংদা অকী- অখঙ থোকহনবা য়ারোই হায়বা খোল্লাউশিং লাউরদুনা ৱাকৎ মীফম চত্থখি। কুকি-নার্কো মিলিটেন্টশিংনা হৌখিবা কুমশিং ২০২৩ গী মে থাগী অহুমদগী হীঙশাগী ঈরাঙ হৌরকখিবা মতমদুদা লৈঙাক্কি সেক্যুরিটি ফোর্সশিং, ইন্টেলিজেন্স এজেন্সিনি হায়রিবা এন আই এ, সি বি আই নচিংবা কদাইদা লৈরুবগে হংলদুনা, খূৎলায় পায়বা কুকি মিলিটেন্টশিংনা মৈতৈগী মীচম-মীয়ামদা মীহাৎ-মীপুনগী থবক পাক-সন্না চত্থরকখিবা মতমদুদা মীয়ামগী পুন্সি অমদি লন-থুম ঙাক্নবা লৈরিবনি হায়রিবা সেক্যুরিটি ফোর্স অমত্তা মশক উবা ফংলক্তবদগী অরম্বাই তেঙ্গোলনা তঙায়ফদনা মীয়ামগীদমক চোংথোরকখিবনি, মীয়ামগী পুন্সি অমদি লন-থুম ঙাক-শেন্দুনা লাকখিবনি হায়খি।

তম্পাক্কি খুল ঙাকপশিংদগী খূৎলায় পূম্নমক মোইথেম তৌদুনা লৌখৎখ্রবা মতূঙদা হৌজিক্না খূৎলায় পায়দবা এ টিগী থৌমীশিং ফাবা হৌরক্লি। থৌওং অসী খূদক্তা লেপত্রবদি লান হৌরক্নবা মীয়ামদা পাউজেল পীবনি হায়না লৌগনি হায়না ঈমা খোঙজঙলোয়শিং অদুনা ফোঙদোকখি।