ঈশাগী লোল, ময়েক্তা মহৈ তম্বা য়ারবনিনা হীরম খূদীংদা চাওখৎপা ঙম্লগনি: সি এম

নেস্নেল এজুকেসন পোলিসি, ২০২০ গী কাঙলোন মতূঙ ইন্না লৈবাক অসীগী মীয়াম্না মশা-মশাগী মমালোন্দা য়ুনিভর্সিটিগী থাক ফাওবা মহৈ -মশিন তমজবা য়াহনখিবা অসিনা লমদম-লমদমগী লোল, ময়েক, ঈশা-ঈশাগী নাৎ অমসুং কলচর য়োকখৎচবদা হেন্না খুদোং চাবা ফংহন্দুনা হীরম খূদীংদা চাওখৎপা ঙমহলল্লগনি হায়না চিফ মিনিষ্টর য়ূম্নাম খেমচান্দনা ফোঙদোকখ্রে।
সমাগ্ৰা শিক্সা মনিপুরনা স্পোন্সর তৌরগা মনিপুর লৈঙাক্কি ইদুকেসন (এস) দিপার্টমেন্টগী মখাদা লৈরিবা বিদ্যা ভারতি শিক্সা বিকাস সম্মিটি মনিপুরনা শীন্দুনা, ষ্টেট অসিগী ইদুকেসন দা অহোংবা পুরক্নবা পান্দমদা পাঙথোকপা, নুমিৎ হুম্নি চত্থগদবা ৱার্কসোপ অমা হৌদোকপদা অথোয়বা মীথূঙলেন ওইনা শরূক য়াখিবা চিফ মিনিষ্টরনা ৱাফম অসী থমখিবনি।
মনিপুর লৈঙাক্কি চিফ সেক্রেটরি পুনিট কুমার গোয়ল, এম এল এ সাপম নিষিকান্তা, বিদ্যা ভারতি অখিল ভারতিয়া শিক্সা সংস্থান, ন্যু দিল্লিগী হান্না মমাঙদা প্রসিদেন্ট ওইরম্বা দা. রামক্রিষ্ণ রাউ, বিদ্যা ভারতি শিক্সা বিকাস সম্মিটি, মনিপুরগী প্রসিদেন্ট প্রোফেসার মাইবম চৌরজিৎসু শরূক য়াখিবা থৌরম অদুদা চিফ মিনিষ্টরনা মখাতানা হায়, লাক্কদৌরিবা কুমশিং ২০৪৭ ফাওবদা মপূঙফানা চাওখৎলবা, ভিক্সিট ভারত অমগী মঙলান্দা চঙশীল্লিবা লৈবাক অসিগী ইদুকেসন পোলিসিগী শরূক অমা ওইনা ৱার্কসোপ অদূ পাঙথোকপনি।ইদুকেসন্দা অনৌবা অহোংবা পুরক্নবা মহাক্কি লৈঙাক্না হনবা নাইদনা চঙশীল্লি হায়খি।
বন্দ, ব্লোকেদ তোয়না চত্থবা, ঈরাং কনবা মনিপুরদা কালেন ছুটিগী মতম ফাওবা তেন্সীন্দুনা, মাঙখিবা মতমশিংদু মেনখৎনবা হোৎনরিবনি হায়বা ৱাফম সি এম্না ফোঙদোকখি।