হন্দক নাগা কাঙলূপকি মীচম তরুক কুকি নেস্নেল ফ্রন্ট -প্রেসিদেন্ট (কে এন এফ -পি) গী কাঙবূ না মতূপ কয়া থোক্না ককথত্তুনা হাৎখিবা থৌওং অদূ মীওইবগী লীচৎকি ৱাংমদনি, য়াম্না কা হেন্না তমথিবা লীচৎ অমনি।লৈঙাক অসীনা অসীগুম্বা কাঙবূ অসীগী মথক্তা হৌজিক ফাওবদা এফ আই আর অমাফাওবা লৌখত্তুনা মরাল লৈবশিং অদূবু ফাগত্তুনা আইনগী অকনবা চৈরাক পীননবা থৌরাং লৌখৎপা ঙমদ্রিবা অসীনা তাকপদি টেরোরিজম শৌগৎপা লৈঙাক অমনি হায়না মীয়াম্না লৌনরকপা য়াই হায়না সেনিয়র এদভোকেট খাইদেম মনি না ফোঙদোকখ্রে।
ঙরাং ইম্ফালগী মোইরাংখোমদা লৈবা মশাগী ময়ূমদা পাঙথোকখিবা পাউমীশিংগা উনবগী থৌরমদা মনিনা ৱাফম অসি ফোঙদোকখিবনি। থৌরমদুদা মহাক্না হায়, মনিপুর লৈঙাক্তা দিপ্যুটি চিফ মিনিষ্টর ওইরিবী নেমচা কিপগেনগী মপূরোইবা অসী কে এন এফ-পিগী লুচিংবনি হায়বসি মীয়াম্না ইখঙ-খঙনরবা ৱাফম্নি। নাগা মীচম তরূক য়াম্না তমথীনা হাৎখিবা অদুসু খূৎলায় পায়বা কুকি কাঙলূপ অসীননি হায়বা খঙনরবনি। টেরোরিজমগী থবক চত্থবদা য়াম্না চাউনা চেন্নরিবা মীশক অমগী লোয়নবী অমবু দিপ্যুটি চিফ মিনিষ্টর ওইনা লৈহনবা হায়বসি টেরোরিজম শৌগৎপা লৈঙাক অমনি হায়না লৌনরক্লোই হায়নিঙায় লৈতে।
মীয়ামগী খোল্লাউ অদূ লৈঙাক্কি কাউন্সিল ওফ মিনিষ্টরনা তাগদবনি অমদি লূম্না লৌবগা লোয়ননা থবক্তা ওন্থোক্নবা হোৎনগদবনি, থৌশাদবা য়াদে হায়বসি কনষ্টিট্যুসনগী আর্টিকল ১৬৪(২) দা ময়েক শেংনা য়াওরিবা অমনি হায়না সেনিয়র এদভোকেট অসীনা ফোঙদোকখিবগা লোয়ননা নেমচা কিপগেন দিপ্যুটি চিফ মিনিষ্টরগী ফমদগী খূদক্তা লৌথোকপগা লোয়ননা মহাক্কি মপূরোইবা অদূ ফাগত্তুনা খ্বাইদগী অকনবা আইনগী চৈরাক পীফম থোকই হায়খি।