সূ দা লৈরিবা কূকি মিলিটেন্টশিং লাকশীন্নবা এন দব্লিয়ু য়ূনা দাবী তৌরি

সেন্টর লৈঙাক্কা সস্পেন্সন ওফ ওপরেসন্স (সূ) এগ্ৰিমেন্ট খূৎয়েক পীনদুনা দেজিগনেটেদ কেম্পশিংদা থম্লিবা কুকি লালহৌবশিং অসীনা সূ গী গ্ৰাউন্দ -রুল থুগাইদুনা অফবা মখলগী খূৎলাইশিং শীজিন্নদুনা মী হাৎপা, ফাদুনা পুখ্রগা মফম খঙহনখিদবা, নমদুনা শেল অমদি অয়াওবা পোৎ-চৈ মুনবা, কিহনবা, মীগী য়ূম-কৈ মৈ থাবনচিংবা তমথিরবা থৌওংশিং চত্থরক্লিবসি য়েংলগা সূ মিলিটেন্টশিং অসী সেন্টরনা খূদক্তা লাকশীল্লু, নাগা এরিয়া নক্না লৈরিবা সূ মিলিটেন্টশিংগী কেম্পশিং অরাপ্পা মফমশিংদা হোংদোকহল্লু হায়না নাগা ৱিমেন্স য়ুনিয়ন (এন দব্লিয়ু য়ূ) না তকশীল্লক্লি।
মিলিটেন্টশিং অসীনা হৌখিবা চহী অহূম হেনবগী মতমসিদা মনিপুরদা চত্থরক্লিবা কা হেনবা হীঙশাগী থৌওংশিং পল্লদুনা এন দব্লিয়ু য়ূ না হায়, হৌখিবা কুমশিং ২০২৩ খক্তদা কা হেনবা থবক কয়ামরুম মিলিটেন্টশিং অসীনা চত্থখি হায়রি।চহী অদূগী মার্চ ২৫ দা মিলিটেন্টশিং অসীনা জে সি বি এক্সকাভেটর অমা মৈ থাখি। কোন্সারাম নাগা ভিল্লেজদা লৈবা মীওই অমগী গারি মচা অমসু লৈলোন ৱাইফৈ ভিল্লেজদা মৈ থাদোকখি।চহীদূমক্কি জূন ১৮ দা লৈমখোংদা লৈবা নাগা লুখ্রাবি অমগী ময়ূম মৈ থাদুনা ঊৎ ওলহনখি।চহীদূগী জুলাই ৬ তা ফিজম হেমজিট (২০) অমসুং হিজম লিন্থোইঙম্বি (১৭) হায়রিবা মহৈরোয় অনি অসী ফাজিনখিবদগী ঙসী ফাওবা মফম খঙহন্দনা লৈরি।মসিতা নত্তনা অতৈ কা হেনবা থবকশিং চত্থদুনা লাক্লি হায়রক্লি।
মনিপুরদা থোক্লিবা হীঙশাগী ঈরাঙ অসী সূ দা লৈরিবা কুকি মিলিটেন্টশিংনা থোকহনবা ওইবনা মখোয়শিং অসি সেন্টরনা লাকশীন্দ্রিফাওবা হীঙসা অসী লেপ্পা লৈখিরোই হায়রক্লি।