থৌবাল দিষ্ট্রিক্টকি খোংজোম পুলিস ষ্টেসন্না কোল্লিবা তেন্থা গ্ৰাম পঞ্চায়েটকি এদমিনিষ্ট্রেটিব কম্মিটিগী চ্যেরপার্সনগী য়ূমদা শকখঙদবশিংনা হেন্দ গ্ৰেনেদ অমা লংশিন্দুনা পোকখায়হনখ্রে। হৌখিবা ইরাই নুমিৎ কি নুংদাংদা গ্ৰাম পঞ্চায়েট অসীগী চ্যেরপর্সন মোইরাংথেম সুবোলগী য়ূমগী শুমাঙদা তাশিল্লকখিবা বোম অদূ পোকখায়রকপদগী য়ূম অদূগী ফক্লাং য়াওনা অতৈ মফম খরা অকায়-অতোয় মায়োক্নখি।
মী অশোক-অপন্নচিংবদি য়াওখিদে। থৌদোক অদূবু কন্না য়ানিংদবা ফোঙদোক্তুনা লৈকায়গী মীয়াম অমদি মৈরা পায়বী লূপশিংনা হৌখিবা থাংজা নুমিত্তা ৱাকৎ মীফম অমা চত্থখ্রে। মীফমদুদা শরূক য়াখিবি খরনা ঐখোয়গী পাউমীদা ফোঙদোরকপা মতূঙ ইন্না, তেন্থা জি পিগী এদমিনিষ্ট্রেটিব কম্মিটি গী চ্যেরপার্সন ওইনা লৈরিবা সুবোলদা হান্না করিগুম্বা মখল অমত্তগী ৱার্নিং পীরকখিবসু লৈতে।পেন্দবা কয়া লৈরবসু ৱারী শান্নরগা ৱাখল তামিন্নদুনা ৱারোয়শিন পুরক্নবা হোৎনবগী মহুত্তা মীচম লৈরিবা য়ূম্লক্তা বোম লংশিন্দুনা অকি-অখঙ মায়োক্নহনখিবা থৌওং অসী মীয়াম্না কৈদৌনুংদা য়াবা ঙম্লোই।
য়াম্না তমথিবা অমসুং পাঙদবগী লীচৎ অমনি হায়না লৌদবা ঙম্লোই হায়খি। কনানা করি মরমগীদমক অসীগুম্বা মথোঙ হুক্তবা থৌওং অসী চত্থরম্লিবনো হায়বদু মীচম মীয়ামদা ফোঙদোকপিয়ু অমদি মতূঙদা অসীগুম্বা পাঙদবগী থবকশিং চত্থদুনা মীয়ামদা অকী-তুজুংবা পোকহনবিগনু হায়না ফোঙদোক্নখি।