চিফ মিনিষ্টর চুরাচান্দপুরদা লাক্তনবা য়ু কে এন এনা অকনবা ৱার্নিং তৌখ্রে

মনিপুরগী চিফ মিনিষ্টর য়ূম্নাম খেমচান্দনা চৎলিবা মে থা অসীগী ১৫ দা চুরাচান্দপুরদা চত্তুনা মীয়ামগী মীফমদা ৱা ঙাঙগনি হায়না থৌরাং তৌরিবা অদূ লেপকদবনি, কুকি -জো কাঙলূপ্না সেপরেট এদমিনিষ্ট্রেসনগী মতাঙদা তাল্লিবা পোলিটিকেল দিমান্দশিং অসীগী চপচাবা ফিরেপ অমা সেন্তর লৈঙাক্না খঙহন্দ্রিফাওবা বফর জোনশিং ঈকায় খুম্নগদবনি। চিফ মিনিষ্টর য়ূম্নাম খেমচান্দ য়াওনা মৈতৈ কাঙলূপকি মীওই অমত্তা চুরাচান্দপুর দিষ্ট্রিক্ট য়াওনা, কুকিশিংগী এরিয়াদা চঙলকপদা অথীংবা থমখিগনি হায়না য়ুনাইটেদ কুকি নেস্নেল আর্মী (য়ু কে এন এ) না অকনবা ৱার্নীং তৌরকখ্রে।

চিফ মিনিষ্টর য়ূম্নাম খেমচান্দনা চুরাচান্দপুর দা চঙননবা হোৎনরক্লিবা অদূ কুকি-জোশিংনা মতম কয়াগী মমাঙদগী সেন্তর লৈঙাক্তা তাল্লক্লিবা পোলিটিকেল দিমান্দ অসীগী ময়ায় চমহন্ননবা অমসুং মায়থীহন্নবা অরোনবা থৌরাং অমগী মখাদা শরৌ শীল্লকপগী থৌওংনি, য়াবা ঙম্লোই হায়রি। চিফ মিনিষ্টরগী থৌওং অসী কুকি-জো মীয়াম্বু তশেংনা শাউহনবা ওইনা থোকই অদূগা করিগুম্বা নমদুনা চঙশীল্লকপা তারবদি থৌরমদু শীল-লাঙলিবশিংনা তেকচাক খূদীংমক পুজগদবনি হায়রক্লি।

হীরম অসীগী মতাঙদা কুকি নেস্নেল ওর্গানাইজেসন (কে এন ও) অমসুং জোমি রি-য়ুনিফিকেসন ওর্গানাইজেসন (জেট আর ও) অনীগী জোইন্ট মিটিং অমসু পাঙথোকখিবগা লোয়ননা, হৌজিক লৈরিবা ফীভমশিং অসী কূপ্না খন্থরগা চিফ মিনিষ্টর চুরাচান্দপুরদা চঙলকপা য়াখিরোই হায়রক্লি। নাকল অমরোমদা, কুকি ইনপি মনিপুর (টিম) নসু চিফ মিনিষ্টরগী চুরাচান্দপুর খোঙচৎ অদূ য়ৈথোক্নবা ৱাফম খঙহল্লকখ্রে।