সেক্যুরিটি ফোর্সনা মীচঙ-মীখায় নাইদনা ঈরাং অসি কন্ট্রোল তৌহন্নিংই : নুংলুম মুইভা

নিপুরদা হৌজিক হৌজিক মায়োক্নরগা লৈরিবা হীঙশাগী ঈরাং অসি, হেক হৌরকপদগী হৌজিক ফাওবদা কুকি -জো কাঙলূপকি মিলিটেন্টশিংনা মৈতৈ অমসুং তাঙ্খুল কম্যুনিটি অনীগী মীচমশিং হাৎপা, য়ূম মৈ থাবা অমদি মীচম মীওই কয়াদা নোংমৈ অমদি বোম কাপশীল্লকপদগী অশোক-অপন মায়োক্নদুনা লাক্লি। মশীঙ য়াম্লবা মীয়াম্না লাঞ্জেন্নদুনা তোঙান তোঙানবা রিলিফ কেম্পশিংদা চঙজফম লৌদুনা লৈরক্লিবা অসি গী চৈরক্তা সেন্ট্রেল সেক্যুরিটি ফোর্সনা কুকি মিলিটেন্টশিংগী মীচঙদা থবক তৌই হায়নরক্লিবসি মখোয়গী থৌওংদগীনি। অসিগুম্বা থৌওংশিং অসী থাদোকপিয়ু, সেন্ট্রেল সেক্যুরিটি ফোর্সনা মীচঙ-মীখায় নাইদনা থবক তৌহন্নিংঙী হায়না কামজোং দিষ্ট্রিক্টকি মনূঙচন্না লৈরিবা রিহা ভিল্লেজগী সেক্রেটরি নুংলূম মুইভানা ফোঙদোকখ্রে।
ভিল্লেজ অসী ফুংয়ার সব-দিভিজনগী মনূঙচন্না লৈবা তাঙ্খুল নাগা কাঙলূপ্না খুন্দারিবা মফম অমনি।কুকি মিলিটেন্টশিংনা এত্তেক চত্থদুনা লান্দারকপদগী লাঞ্জেন্নদুনা,অৱাবা মায়োক্নরবা খুঞ্জাশিংদা তেঙবাং পোৎলমশিং য়েন্থোকখিবা থৌরমদা শরূক য়ারদুনা মুইভানা ৱাফম অসী ফোঙদোকখিবনি।তম্পাক্কি ক্লব, ওর্গানাইজেসনশিং অমদি মৈরা পায়বী লূপশিংনা রিহা ভিল্লেজদা চত্তুনা তেঙবাং পোৎলমশিং পীখিবা থৌরমদুদা খুল অসীগী নিংথৌ ৱুঙ্গানিং মাহিং, থোংজু স্পোর্তিং ক্লবকি প্রসিদেন্ট নামৈরাকপম চীঙ্খৈ, সাউথ তাঙ্খুল য়ুনিয়নগী চ্যেরমেন অক্বিতিন কাসুং অমদি নামৈরাকপম লৈকায় অপূনবা মৈরা পায়বী লূপকি প্রসিদেন্ট থৌদাম ইনাওচা দেবিনা দাইজ মেম্বরশিং ওইনা শরূক য়াখি।
নুংলুম মুইভানা মখাতানা হায়, রিহা ভিল্লেজ অসী দাম শাখিবদগী অৱাবা মায়োক্নরবা খুল অমনি।পাম্লৌ তৌদুনা খুঞ্জাশিং হিংলিবা ঙাক্তনি।লৈঙাক্নসু কুপ্না য়েংশিনবিবগা লোয়ননা ঈরাং অসী মতম পূম্নমক্কি ওইনা লোইশিলহন্ননবা থৌরাং পায়খৎপিয়ু হায়না মহাক্না আপিল তৌখি।