সি আর পি এফনা কাপ্পদা লৈখিদ্রবা মীওই অহুমগী হকচাং লৌদুনা অরোয়বা মথৌ-মঙম পাঙথোকখ্রে

চৎলিবা এপ্রিল থা অসীগী তরেৎকি অহীঙ নোংয়াই মতূঙ পূঙ অমা মখায়রোম তারকপা মতমদা বিষ্ণুপুর দিষ্ট্রিক্টকি মনূঙচন্না লৈরিবা ট্রোংলাউবী অৱাং লৈকায়দা লৈবা ঈমূঙ অমদা কুকি মিলিটেন্টশিংনা বোম কাপশিন্দুনা পীক্লিবা অঙাং অনী হাৎখিবা অমসুং মখোয়গী অপোকপী মমাবু তমথীনা শোকহনখিবা থৌদোক অদূবু য়ানিংদবা ফোঙদোক্তুনা গেলমোন্দা লৈবা সি আর পি এফকি কেম্পতা থোমজীনবদা সি আর পি এফ পার্সনেলশিংনা নোংমৈ কাপথোরকপদা লৈখিদ্রবা মীওই অহুমগী থৱায় য়াওদ্রবা হকচাংশিং ঙরাং মীয়াম্না লৌখিবগা লোয়ননা মখোয়গী অরোয়বা মথৌ-মঙম পাঙথোকখ্রে।

লৈখিদ্রবশিং অদূ এপ্রিল তরেত্তগী ঙরাং ফাওবা রিম্সকি মোর্গ তা থম্লকখিবনি।মীওই অহুম অদূ লৈখিদবগী মতাঙদা শেমখিবা জে এ সি, মখোয়গী ঈমূঙ-মনূঙগা লৈঙাক অসীগা ৱারী শানরবা মতূঙদা কন্দিসন খরদা য়ানবা পুরকখিবদগী মখোয়গী হকচাঙশিং অদূ মীয়াম্না ঙরাং রিম্সকি মোর্গতগী লৌথরবা মতূঙদা ফৌগাকচাউ ইখায় লমথাবুঙ লম্পাক্তা পুথখিবনি।

এপ্রিল ৬ অমসুং৭ কি লোন্নবা অহীঙদা কুকি মিলিটেন্টশিংনা বোম কাপশিন্দুনা তমথীনা হাৎপীখ্রবা পীক্লিবা অঙাং অনী অদূগী মতাঙদা শেমখিবা জে এ সিনা চঙশীল্লকপা মতূঙ তারকপা খোঙজঙ খূদীঙমক্তা, হন্দক লৈখিদ্রবা মীওই অহূম অসীগী ঈমূঙ-মনূঙগী মীওইশিংনা মাঙজীল থানা চোংথোক্তুনা মতেঙ পাংগনি, কৈদৌনুংদা মায় লৈদুনা চৎলোই হায়না লৈখিদ্রবা অহুমগী মনূঙদগী অমা ওইরিবা ৱাহেংবম বোবীগী মাম্মা থোকপা লাইশ্রম জোগিন্না মীয়ামদা ফোঙদোকখি। লৈখিদ্রবশিং অদুদি, ৱায়খূরোক্তগী লাইশ্রম জিতেন (৫১), শগোলবন্দ তেরা লুক্রাম লৈরক্তগী হুইদ্রোম মাইকেল (২২) অমসুং কুম্বি তেয়াখোং ৱার্দ নম্বর ৭ তগী ৱাহেংবম বোবী (২৯) নি।