নুমিৎ মঙানি চত্থগদবা টোটেল সটদাওন ঙরাংদগী হৌখ্রে, মীয়ামগী পুন্সিদা চাউনা অপনবা পীরে

চৎলিবা এপ্রিল থা অসীগী তরেৎকি অহীঙ নোংয়াই মতূঙ পূঙ অমা মখায়রোম তারকপা মতমদা বিষ্ণুপুর দিষ্ট্রিক্টকি মনূঙচন্না লৈরিবা ট্রোংলাউবী অৱাং লৈকায়দা লৈবা ঈমূঙ অমগী পীক্লিবা মচীন-মৌপ্ৱা অঙাং অনী কুকি মিলিটেন্টশিংনা বোম কাপশিন্দুনা হাৎখিবা অমসুং মদূগী মতূঙ তাবদা সি আর পি এফ না নোংমৈ কাপ্পদা মীওই অহূম লৈখিদবা অদূগী মতাঙদা শেমখিবা জে এ সিনা, হৌখিবা এপ্রিল ১৮ অমসুং ১৯ গী লোন্নবা অহীঙ নোংয়াইদগী মনিপুর পূম্বগী ওইনা কৌখিবা নুমিৎ মঙানিগী টোটেল সটদাওননা লমদম অসিগী মীয়ামগী মহৌশাগী পুন্সিদা য়াম্না চাউনা অকায়বা পীরে।

জে এ সিগী মীহূৎশিংনা মনিপুরগী চিফ মিনিষ্টর য়ূম্নাম খেমচান্দগা থেঙ্খাং অনীরক্তা ৱারী শান্নখ্রবসু মপূঙ ফানা য়ানবা পুরকপা ঙমখিদ্রবা মপূঙ, অঙাঙ অনী হাৎপদা চেন্নরিবা মীওইশিং অদূ চৎলিবা এপ্রিল থা অসীগী ২৫ ফাওবগী মনূঙদা ফাদুনা আইনগী চৈরাক পীয়ূ অদুগা মীওই অহুম হাৎখিবা সি আর পি এফ পার্সনেলগী মথক্তা অকনবা থবক লৌখৎলু হায়বা দাবী তকশীন্দুনা টোটেল সটদাওনগী খোঙজঙ অসী চঙশীনখিবনি।

ঙরাং অয়ূক পূং ৯ লোম তাবদা জে এ সীগী মীহূৎশিং অমদি খোঙজঙ অসীবু শৌগৎপা মশীং য়াম্লবা মীয়াম্না লম্বীদা থোক্লক্তুনা অচৎ-অওক তৌরম্বা মীওইশিং থিংবা হৌখি। অয়ূক অঙনবা মতমদা লম্বীদা চেন্নরম্বা গারীশিং অয়ূক্কি পূঙ ৯.৩০ রোম তারকপদদি অমত্তা চৎনখিদে।গারীশিং চৎপা মপূঙ ফানা অথীংবা থমখি। খ্বাইরম্বন্দ কৈথেল য়াওনা মরূওইবা অতৈ কৈথেলশিং খুন্তাক-লান্সিবগা পাঙ্খক ওইরে। ওইল পম্পশিং থোঙ লোনখ্রে। স্কুল -কোল্লেজ পূম্নমক থোঙ লোন্নখ্রে।