লমদম অসীগী নূপীলক্তগী মীথোয়-মীহেল্লবী, শক্নায়রবী অইবী অমা ওইরম্বতা নত্তনা মনিপুর ষ্টেট কম্মিসন ফোর ৱিমেন (এম এস সি দব্লিয়ু) গী চ্যেরপার্সন ওইনসু থৌ পুরম্বি দা.চোংথাম জামিনি দেবী ঙরাং মশাগী অনাবা অমনা মরম ওইদুনা মশামক্কি য়ূমদা লৈখিদ্রে। মহাক্না লৈখিদবদা মশাগী চহী ৯০ শুখ্রে।
শক্নায়রবী নূপী লুচিংবী অসী অইবী অমা ওইরম্বতা নত্তনা ওজাগী শিনফমদসু মতম কুইনা মহৈরোয়শিংবু লমজীঙবিরম্মী। মহাক ভেটরান স্পোর্টস ৱিমেন অমা ওইনসু মীয়াম্না শকখঙনখিবী, মায়থোঙ য়াম্বী মীশক অমনি।মহাক্না খুনাই অসীগী নূপীশিংগী শেল-থুমগী ফীভম ফগৎহন্ননবা অমদি মশানা মশাবু থবক পীজদুনা ঈমূঙ-মনূঙ পুজবা ঙম্ননবা পান্দমদা মতেং কয়ামরুম পাংবিরম্মী।
দা. জামিনি না খঙহৌদনা লৈখিদবদা মনিপুরগী হান্নগী চিফ মিনিষ্টর নোংথোম্বম বিরেন না থম্মোয় শোক্না অৱাবা ফোঙদোরক্লি।