থীনূঙ্গৈদা ঈরাং লাকশীনবা ঙম্লে, মীয়াম্না লৌখিবা নোংমৈ ৮ সু রিকোভর তৌখ্রে: গোবিন্দাস

চৎলিবা এপ্রিল থা অসীগী ১৪, চৈরাওবা নুমিত্তা বিষ্ণুপুর দিষ্ট্রিক্টকি মনূঙচন্না লৈরিবা থীনূঙ্গৈদা মীয়াম্না তোকঙা থাজরুবদগী সেক্যুরিটিগী গারি অনী মৈ থাখিবগা লোয়ননা নোংমৈ ৮ সেক্যুরিটি ফোর্স পার্সনেলশিংদগী মুনখিবা লোয়ননা মতূঙ তারকপদা মীচম খরা শোকপা য়াওনা নাকল অনিগী মরক্তা টেন্সন ৱাংনা লৈনরুবা থৌদোক অদূ হৌজিক মপূঙ ফানা ঈরাং লাকশীনবা ঙম্লে হায়না মনিপুর লৈঙাক্কি হোম মিনিষ্টর গোবিন্দাস কোন্থৌজম্না পাউমীশিংদা ফোঙদোকখ্রে।
ঙরাং ইম্ফালগী মন্ত্রিপুখ্রিদা লৈবা ন্যু সিভিল সেক্রেটরিয়েত্তা পাঙথোকখিবা পাউমীশিংগা উনবগী থৌরমদা মিনিষ্টরনা ৱাফম অসী ফোঙদোকখিবনি। মহাক্না হায়, এপ্রিল ১৪ গী অয়ূক পূঙ ১০.৩০ রোম তারকপদ ইম্ফালগী বির টিকেন্দ্রজিৎ ইন্টর্নেস্নেল এয়রপোর্টতা দ্রগ পুদুনা চৎখিগদৌরে হায়বা অখন্নবা পাউ অমা ফংবদগী সি আই এস এফ অমসুং এয়রপোর্ত পুলিসকি অপূনবা টিম অমনা থি-হূম্বগী থবক চত্থবদা বিষ্ণুপুর দিষ্ট্রিক্টকি মনূঙচন্না ক্বাক্তা খূমন থোঙ্খোংদগী মোহম্মদ সবির অহম্মদ কৌবা মীওই অমদগী ব্রাউন সুগরনি চিংনবা পাউদর কিলোগ্ৰাম ৬.৪ ফাগৎপা ঙমখি। মখাতানা ৱাহং-পাউহং চত্থবদা ক্বাক্তা এরিয়াদা দ্রগ অমসুং খূৎলায় খরসু লোত্তুনা লৈহৌরি হায়রকপদগী থীনূঙ্গৈরোমদা এ আর পার্সনেলশিং য়াওনা, সিভিল দ্রেশতা নোংমৈ পুদুনা লাকপগী লম্বীদা নূপী অমনা কুকি লাক্লে হায়না লাউরকখিবগী ভিদিও অমা ভাইরেল ওইরকখিবদগী পামদবা থৌদোক্তু থোকখিবনি।
সেক্যুরিটি ফোর্সতগী মীয়াম্না মুনখিবা নোংমৈ ৮ মক রিকোভর তৌখ্রে।মীয়াম্না মতূঙদা তোকঙা থাজবিগনু হায়না মিনিষ্টরনা ফোঙদোকখি।
মীয়াম অদূনা সেক্যুরিটিগী গারি অনী সু মৈ থাখি।মীচম ২৩ সু থৌদোক্তুদা শোকখিবনি।