ইম্ফাল ইষ্ট দিষ্ট্রিক্টকি কৈরাউ কেন্দ্রগী মনূঙ চন্না লৈরিবা ফূনাল মরিং খুলগী খুঞ্জাশিংনা আইনগী ৱাংমদা,মখোয়গী খুল অদুদগী কিলোমিটর অহূম্লাম লাপ্না খন্নরোক মৈতৈ খুললোমদা চঙশীল্লক্লগা পন্থোং অমসুং গেটনচিংবা শাজিল্লকপদগী ঙরাং খোয়শাওনরবা খন্নরোক্কি খুঞ্জাশিংনা গেট অমসুং পন্থোং অদূ থুদেকখ্রে।
মসীগী মতাঙদা মতম কুইনা য়েৎনদুনা লাকখিবনি হায়রি, অদূম ওইনমক হৌখিবা কুমশিং ২০২৩ গী মে অহুমদগী মৈতৈ অমসুং কুকি কাঙলূপ অনীগী মরক্তা থোক্লকখিবা হীঙশা য়াওবা ঈরাং অসীনা মরম ওইদুনা মতম খরা নেমথরুরবা মতূঙদা পন্থোং অমসুং গেটনচিংবা লৈরিবা অদু ইভিক্সন চত্থবিয়ু হায়দুনা খন্নরোক্কি খুঞ্জাশিংনা ফোরেষ্ট ওফিসিয়লশিংদা হায়জরুবদা য়ানা-য়ানবা ঙাঙনৌ হায়বা ৱাফম ফোঙদোরকপদগী খোয়শাওনরবা মীয়াম্না খোঙথাঙ অসী লৌখৎখিবনি হায়রি।
ফূনাল মরিং খুল অসী মফম অদূদা খুন্দারকপসু কুইদ্রিবনি অদুবু খন্নরোক হায়রিবা, মৈতৈ কাঙলূপ্না খুন্দারিবা খুল অসিদি ঙসীদগী চহী ৫০০ রোমগী মতমদগী লৈরক্লবনি হায়না খুঞ্জা অমনা ফোঙদোরকখি।