রিম্সতা য়ু সি ই বি আই কনফরেন্স হৌদোকখ্রে

মেদিকেল প্রোফেসন্দা লৈরিবা দাক্টরশিং অমসুং ইঞ্জিনিয়রশিং খূৎশম্নদুনা অনা-লায়েংগী থবক-থৌরমশিংদা খূমাঙ য়াঙশীন্না থবক পায়খৎপা ঙম্নবা পান্দমদা থবক চঙশীনবা ঙম্ননবা মেদিকেল এঙ্গেজ:য়ুনাইটিং ক্লিনিসিয়ন এন্দ ইঞ্জিনিয়র ফোর বাইওমেদিকেল ইন্নোভেসন (য়ু সি ই বি আই) হায়বা থিমদা মেদিকেল প্রোফেস্নেলশিং, ইঞ্জিনিয়রশিং, রিছরচরশিং অমসুং মহৈরোয়শিংনা শরূক য়াদুনা নুমীৎ নিনিগী ওইনা চত্থগদবা কনফরেন্স অমা ঙরাং ইম্ফালগী রিজনেল ইন্সটিট্যুট ওফ মেদিকেল সাইন্সেস (রিম্স) তা হৌদোকখ্রে।

নেস্নেল ইন্সটিট্যুট ওফ টেক্নোলোজি (এন আই টি) মনিপুর, এন আই টি নাগালেন্দ অমসুং রিম্স ইম্ফালনা খূৎশম্নদুনা পাঙথোকখিবা থৌরম অদুদা ৱা ঙাংলদুনা রিম্সকি দিরেক্তর প্রোফেসার জি সুনিল কুমারনা হায়, হৌজিক্কি মতমসিদা অনা-লায়েংগী হীরমদা ইঞ্জিনিয়রশিংনা লৌরিবা থৌদাং অসি মরু ওইরক্লি। মেদিকেল প্রোফেসনেল অমগা চপ মান্নবা মওংদা ইঞ্জিনিয়রশিংনা থৌদাং লৌরিবনি।হোস্পিটাল অমদা, অনাবা মীওইশিং অমসুং মখোয়বু সেবা তৌগদৌরিবা ইমুঙগী মীওইশিংনা লৈগদৌরিবা কা ময়াম অদূ মতৌ করম্না থমগদগে,করম্না শেম-শাগদগে হায়বসি ইঞ্জিনিয়র অমগী কোক্তগী পুথোরকপনি।

অনাবশিংগী লায়েঙবদা শীজীন্নরিবা পোৎলমশিং ইঞ্জিনিয়ারিংগী পোত্থোক ঙাক্তনি।দাক্তরশিংদি মতৌ করম্না অনাবা ফগৎহনগদগে হায়বগী হীরমশিংদা লায়েঙবগী থবক তৌবনি অদুগা অনাবদু ফগৎনবা হোৎনবদা তঙায়ফদনা চঙলিবা পোৎলমশিং অদুনা ইঞ্জিনিয়রশিংনা শারকপনি হায়খি। কনফরেন্স হৌদোকপা থৌরমদুদা এন আই টি মনিপুরগী দিরেক্তর প্রোফেসার সোমায়াজুলুন সু অখন্নবা চিফ গেষ্ট ওইনা শরূক য়াখি।