কংলৈ পিপল্স এগেন্স নার্কোটিক্স এন্দ সাইকোট্রোপিক সব্সটেন্স (কংলৈ পানাজ) লিংখৎখিবগী মরিরক শুবা কুমোন থৌরম লাক্লিবা ফেব্রুৱারী তরেত্তা পাঙথোক্লগনি।
নিষাগী মায়োক্তা ঐখোয় পূন্না লেপমিন্নরসি হায়বা পাউজেল পুবা বাইক রেল্লি অমগা লোয়ননা মপোক কুম্মোন থৌরম অসী পাঙথোক্কদবনি হায়রি।লূপ অসিনা খঙহল্লকপগী মতূঙ ইন্না, ফেব্রুৱারী তরেৎকি অয়ূক পূঙ ১০ তাবদা বাইকর ২০০ হেনবনা শীঙজমৈ চীঙামখাদা লৈরিবা হাও গ্ৰাউন্দা পূল্লবা মতূঙদা তোঙান তোঙানবা,নিষাগী মায়োক্তা লৈবা খোল্লাউশিং লাউবগা লোয়ননা বাইক রেল্লি অদূ লমথাগনি।
রেল্লি অসি শীঙজমৈ-কোংবা লম্বীদা লাক্লগা অন্দ্রো পার্কিং তারক্লবা মতূঙদা মথং-মথং ন্যু চেক্কোন, হত্তা-মিনুথোং, খোয়াথোং ট্রাফিক পোইন্ট য়ৌরক্কনি। মসিগী মতূঙ কংলাগী নোংচূপথংবদা লৈবা মেইন গেট য়ৌশিল্লবা মতূঙদা বাইকরশিং অদুবু জি এম হোলদা মীয়াম্না তরাম্না ওকপগা লোয়ননা মপূঙ ওইবা থৌরম মফম অদুদা পাঙথোক্কদবনি হায়রি।