কুকিশিংগী য়ুনিয়ন টেরিটোরিগী ৱাফম সেন্টর লৈঙাকনা শৌগত্তে হায়না এম ঐচ এনা খঙহল্লকখ্রে

কুকি -জো কাঙলূপনা মনিপুরদগী লমগী শরূক কয়ামরূম শেত্তোক্লগা মখোয়খক্তগী ওইবা,লেজিসলেটিব এসেমব্লি য়াওবা য়ুনিয়ন টেরিটোরি অমা থম্বিয়ু হায়না দিমান্দ তৌরিবা অদূ সেন্টর লৈঙাক্না পূক্নীঙ থৌগত্তে,শৌগত্তে হায়না য়ুনিয়ন হোম এফিয়র্স মিনিষ্ট্রিগী এদভাইজর ( নোর্থ ইষ্ট) ওইনা লৈরিবা এ কে মিশ্রানা ময়েক শেংনা ফোঙদোক্তুনা কুকি -জো লুচিংবশিংদা খঙহনখ্রে। চৎলিবা নবেম্বর থা অসীগী ৬ অমসুং ৭ তা নুমিৎ নীনী চঙনা ৱারী শান্নখিবা মীফমদা হোম এফ্যের্স মিনিষ্ট্রিগী মায়কৈদগী ৱাফম অসী থম্লকখিবনি।কুকি -জো কাঙলূপকি লালহৌলূপশিংগী অমব্রেল্লা ওরগানাইজেসন অমা ওইনা লৈরিবা কে এন ও অমসুং য়ূ পি এফকি লুচিংবশিং শরুক য়াদুনা চত্থখিবা ৱারী শান্নবগী মীফম অদূগী অহৌবা নুমিত্তা,হৌখিবা সেপ্তেম্বর ৪দা হোম এফ্যের্স মিনিষ্ট্রি, মনিপুর লৈঙাক অমসুং সূ সাইন তৌনবদা য়াওরিবা খূৎলায় পায়বা লূপশিং অসীগী মরক্তা চত্থখিবা ট্রাইপর্টাইট টোল্ক অদূগী মতাঙদা রিভ্যু দিসকসন পাঙথোকখি।নীনী চনবা নুমিৎ নবেম্বর ৭ তা কুকি লিদরশিং অদূগী মায়কৈদগী লেজিসলেটিব এসেমব্লি য়াওবা য়ুনিয়ন টেরিটোরি অমা থম্বিয়ু হায়না অকনবা দিমান্দ তৌরদুনা তকশীনখি।

মখোয়না ফোঙদোরকখিবা মতূঙ ইন্না,মনিপুরনা নীঙতম্বা ফংদ্রিঙৈ মতমদগী হৌনা কুকি -জো ফূরুপ অসীগী মশাগী লমগী শরুকশিং তোপ তোপ্না লৈজরকপনি।মদূ মনিপুর ষ্টেট দরবার নত্রগা মনিপুরদা সাসন তৌরকখিবা মৈতৈ নিংথৌশিংগী কন্ট্রোল মখাদসু লৈরকখিদে।কুকি চিফশিংনা মশাগী লমখৈ ঙাক -শেন্দুনা লৈরকখিবনি।ব্রিটিস পোলিটিকেল এজেন্টনা হকথেঙননা সাসন তৌবা, গভর্নমেন্ট ওফ ইন্দিয়া এক্ট,১৯৩৫ গী মখাদা “এক্সক্লূদেদ এরিয়া” অমা ওইনা লৈরকখিবনি।মরম অদূনা কুকিগী দিমান্দ অসীদি অদূঙৈ মতমদুগী ইন্দিপেন্দেন্স ওটোনোমি অদূ হঞ্জিলহনবিয়ু হায়জবনি হায়বা ৱাফম কয়া থম্লকখি।

মখোয়গী ৱাফমশিং তারবা মতূঙদা এ কে মিশ্রাগী মায়কৈদগী, মদূ য়াম্না সেন্সিটিব ওইবা ইস্যু অমনি হায়বা ৱাফম থমখিবগা লোয়ননা মনিপুরদা লৈমিন্নরিবা অতৈ কাঙলূপশিংগা পূন্না ফম্মিন্নদুনা য়ান্নবা পুরকপা হান্না মথৌ তাগনি হায়খিবগা লোয়ননা কুকি খক্তগী য়ুনিয়ন টেরিটোরি অমা থম্বিয়ু হায়না দিমান্দ তৌরিবা অদূ সেন্টর লৈঙাক্না পূক্নীঙ থৌগত্তে, শৌগত্তে হায়না থমখিবনি।