মনিপুরগী ঈমা-ইবেলশিংনা নীংশীংবা থোক্ট্রবা মতমদগী হৌনা, মথায় থায়না লাই হাক্তক্তগী শীজিন্নদুনা লাক্লবা লমদম অসীগী ঈপানাৎ- ঈপূনাৎকি শক্তম অমা ওইনা লৈরক্লবা শাফী- লানফি হায়না খঙনরবা, মনিপুরগী অখন্নবা, তোমথিন ওইরিবা পোত্থোক অমা ওইনা জিওগ্ৰাফিকেল ইন্দিকেসন (জি আই) টেগ ফংলবা, খূৎনা লোন্দুনা শেম-শারবা ফি মখল অসী ঙসীদি এয়র ইন্দিয়া এক্সপ্রেস ফ্লাইটকি মমৈগী শরুক্তা লৈতেং ওইনা শীজিন্নবা হৌখ্রে। মসিনা মনিপুরগী তোমথিন ওইরিবা ফিজোল মখল অসী মালেমগী মীয়াম্না হেন্না মশক খঙবা হায়বদু ওইরক্লে।
শাফী- লানফিগী মচু অসী ইঞ্জিনিয়রশিংনা এয়র ইন্দিয়াগী মমৈগী শরুক্তা নীংথিনা, য়াম্না মওং-মরীল তানা, খূৎ চঙনা য়েকপা ওইনা তৌই হায়নরি। ফি মখল অসী মনিপুরগী মৈতৈ নিঙোলশিংনা অতৈ মখলগী পোৎলমশিং অমত্তগী মতেং লৌদনা লশিংগী লং খক্তমক শীজিন্নরগা য়েত্তুম শীজিন্নরগা তোপ- তোপ্পা মওংগী শক্তমশিং অখন্ননা লাকশীল্লগা য়েকপনি।
মসিদা শামূ, সগোল, ৱাহোংনচিংবগী শক্তম য়াওই। মসিগীসু মথক্তা নুমিৎ, থা, থৱানমিচাক, সিংহাসন, তা নচিংবগী শক্তমশিংসু য়াওহল্লি। মৈতৈশিংনা লানফমদা মায় পাক্লক্লবা মতূঙদা খূদোলপোৎ ওইনা তম্ননবা অখন্নবা ফীজোল মখল অমা ওইনা শীজিন্নদুনা লাক্লিবনি। শা-লান শোক্নরুরবা মতূঙদা মায় পাক্তুনা হল্লকখিবা থৌনা ফরবা লান্মীশিংদা শাফী- লানফি অসী খূদোল তম্বগী চৎনবী লমদমসিদা নিংথৌ লৈঙাকশিংগী মতমদা লৈরকখি হায়রি।