রিমস হোস্পিটাল মীহাৎপূঙ ওল্লব্রা হায়না মীয়াম্না অকনবা মওংদা প্রোটেষ্ট তৌখ্রে

হন্দক রিজনেল ইন্সটিটিউট ওফ মেডিকেল সাইন্সেস (রিমস) হোস্পিটালদা অঙাঙ উনবগী কেসশিংদা মৌ নহা কয়ামরুম শিবগী থৌদোকশিং মশীঙ হেঙ্গৎলকপদা মীয়াম্না অঙকপা পোক্নবগা লোয়ননা অশাওবা ফোঙদোক্নরক্তুনা অকনবা প্রোটেষ্ট কয়া চত্থরকপদগী রিমস অথোরিটি লোত্তুনা লৈখিবগী ফীভমশিং উবা ফংলি।
ঙরাংসু ইম্ফাল ৱেষ্ট দিষ্ট্রিক্ট কি মনূঙচন্না লৈরিবা লিলোং চজীংদগী চীঙশুবম ওঙবী মঞ্জু (৩৫) কৌবী মৌ নহা অমা রিমসতা অঙাঙ নূপীমচা অমা সর্জিকেল দিলিভরি তৌদুনা উনরবা মতূঙদা দাক্তরশিংনা থৌশাদবদগী লৈখিদ্রে হায়রি। মহাক মরী লৈনবা মেদিকেল অথোরিটিনা থৌশাদবদগী লৈখিদবনি হায়না মহাক্কি ইমূঙ-মনূঙগী মীওইশিং অমদি লৈকায়গী মীয়াম হৌরক্তুনা রিমসতা থোমজীল্লকখি। মীয়ামগী পেন্দবা ৱাকৎশিং অদূ তাবিদুনা মতীকচাবা পাউখুম পীবগী মহুত্তা রিমস অথোরিটিনা থোঙ লোন্সীন্দুনা লৈখিবদগী খোয়শাওনবা হেল্লবা মীয়ামদুনা অকনবা দিমোন্সট্রেসন অমসুং খোল্লাউ কয়াগা লোয়ননা রিমসকি থোঙ কাওখায়খিবগা লোয়ননা পোৎ-চৈ কয়ামরুম থুগাইদুনা অমাঙ- অতা থোকহনখি।
মঞ্জু না সর্জিকেল দিলিভরি তৌদুনা নূপীমচা অমা উনরবা মতূঙদা মশাগী ফীভম অসূম অসুম লুশীল্লকখিবা মতমদুদা দাক্তর অমত্তা লাকখিদে হায়রি। মহাক্কি মীশী অদূগী মতাঙদা লৈঙাক্না মপূঙফানা ইনক্বারি অমসুং ইনভেষ্টিগেসন চত্থদুনা মরাল লৈবশিং মতীকচাবা চৈরাক পীননবা লৈকায়গী মীয়াম্না অকনবা দাবী তৌখি।
খঙ- হৈরবা দাক্তরশিংনা লন্নাই ক্লিনিকশিংদা মরন্নাইগী শেল তান্দুনা লৈরগা রিমসতা লৈরিবা মেদিকেল মহৈরোয়শিং থাজীন্দুনা অনাবশিং লায়েংহনবদগী অসীগুম্বা পামদবা থৌদোকশিং হন্দক য়াম্না তোয়না থোকপনি হায়না মীয়াম্না ঙাঙনরক্লি।