হৌখিবা কুমশিং ২০১৩ গী জানুয়ারি ২৯ দা মনিপুর লৈঙাক্কি ফোরেষ্ট, এনভাইরনমেন্ট এন্দ ক্লাইমেট চেঞ্জ দিপার্টমেন্ট না অকনবা ওর্দর অমগা লোয়ননা লমদম অসীগী পব্লিক অমসুং সেমি- পব্লিক জোনশিংদা নিল- খোংবা, অরাঙবা খোঞ্জেল থাদোকপা য়ারোই হায়দুনা মীয়াম অমসুং মরী লৈনবা খূদীংমক্কি মফমদা খঙহন্দুনা, অসীগুম্বা মরূওইবা মফমশিংদা সাইনবোর্দ কয়া থেত্তুনা থমখ্রবসু ট্রাফিক পুলিশ য়াওনা লৈঙাক্কি অথোরিটিশিং অমসুং মীয়াম্না থৌশাদবগী থৌওংশিং উবা ফংলি।মসী য়াম্না লাইবক থীবা অমনি হায়না লৌফম থোকপনি।
মীয়াম্না লৈঙাক্কি ফজখ্রবা য়াথং অসী ঙাক্না চৎনদবা থেংনরি। এনভাইরনমেন্ট প্রোটেক্সন এক্ট, ১৯৮৬ কি মতূঙ ইন্না হোস্পিটালশিং, স্কুল-কোল্লেজ, সেক্যুরিটি জোনশিং অমসুং মরূওইবা লম্বীশিংদা কনাগুম্বনা লাউদ স্পিকরশিং, পব্লিক এদ্রেস (পি এ) সিষ্টেম্নচিংবা শীজিন্নবা, গ্যাস-হোর্ন শীজীন্নদুনা কা হেন্না নত্রগা কা হেন্দববু ওইরবসু,খোঞ্জেল থোকহন্দুনা নোইজ পোল্যুসন থোকহনবগী থৌওংশিং অমত্তা চত্থবা য়ারোই হায়না পল্লি।
লৈঙাক্কি ওর্দর অসীবু থওইদবশিং এক্ট অসীগী মতূঙ ইন্না অখনবা আইনগী চৈরাক ফংগনি হায়রিবনি। অদূম ওইনমক গারী থৌরিবশিং অমদি মীয়াম্না মাঙজৌননা মরী লৈনবা দিষ্ট্রিক্ট মেজিষ্ট্রেটশিংদগী অয়াবসু য়াওদনা অসীগুম্বা সাইলেন্ট জোনশিংদা লাউ- খোংদুনা নোইজ পোল্যুসন থোকহনবগী থৌওংশিং ঙাইহাক লৈতনা থোকহল্লিবা অসীদা লৈঙাক্কি অথোরিটি অমত্তনা মীৎয়েং চঙবা উবা ফংদবসি য়াম্না লাইবক থীবনি হায়না মায়কৈ কয়াদগী মীয়াম্না ফোঙদোক্নরক্লি।