লন্দন্দা পাইগদবা এয়র ইন্দিয়া বোইং ৭৮৭ দ্রিমলাইনর এয়রক্রাফট খঙহৌদনা কায়খ্রে

গুজরাট কি কেপিটেল সিটি অহমেদবাদতা লৈবা সর্দার বল্লবভাই পটেল ইন্টর্নেস্নেল এয়রপোর্ট ( এস ভি পি আই এ) তগী লন্দন্দা পাইগদবা এয়র ইন্দিয়া বোয়িং ৭৮৭ দ্রীমলাইনর এয়রক্রাফট অমা এয়রপোর্টতগী পাইখৎখিবা মতূঙ ঈকান কান্নদনা খঙহৌদনা কায়দুনা তাশীনখিবগা লোয়ননা মৈ চাকখ্রে।পেসেঞ্জর এয়রক্রাফট অদূ ঙরাং নুংথিল পেসেঞ্জর ২৩০, কেবিন ক্রু মেম্বর ১০ অমসুং পাইলোট ২ , পূন্না মীওই ২৪২ পুরগা লন্দনগীদমক পাইখৎখিবনি। এয়রক্রাফট অদূ মতৌ করম্না অমসুং করি অশোয়বা লৈবদগী কায়খিবনো হায়বগী মতাঙদা হৌজিকমক্কি ওইনা মরী লৈনবা ওফিসিয়েলশিংনা ফোঙদোরকপা লৈত্রি।
তোঙান তোঙানবা এজেন্সিশিংগী ফায়র ইঞ্জিনশিং অমসুং এম্বুলেন্স কয়ামরুম থৌদোক থোক্লিবা মফমদুদা য়ৌশিনখিবগা লোয়ননা রেসক্যু ওপরেসনগী থবক লৌখৎপা হৌখ্রে। লমশাং পাইগদবা এয়রক্রাফট ওইবনা থাউ পীক থন্না হাঞ্জিনখিবা অদুনা মরম ওইরগা এয়রক্রাফট অদূ কায়দুনা তারকখ্রবা মতূঙদা কা হেন্না অহৌবা মখোলগা লোয়ননা মৈরী য়াম্না ৱাংনা কাখত্তুনা অকীবা ফংলবা মওংদা মৈ চাকখি। মদূনা মরম ওইরগা রেসক্যু ওপরেসন্দা অপন- অরাক কয়া য়াওখিবদগী খূমাঙ চাওশীন্না মী কনবা ঙমদবগী ফীভম মায়োক্নখি।
প্লেন অদূ দাক্তরশিংগী হোষ্টেল অমদা কায়দুনা তাশিনখিবনি হায়রি। দিরেক্তরেট জেনরেল ওফ সিভিল এভিয়েসন না বোয়িং কম্পেনিগী টেক্নিকেল টিমগা লোয়ননা চঙশীন্দুনা ফোর্মেল ইনভেষ্টিগেসন চত্থনবা থবক পায়খৎপা হৌখ্রে। এয়রপোর্ট অদূ মতম খরগী ওইনা অথীংবা থমদুনা ওপরেসন পূম্নমক চপ লেপখ্রে। ইন্দিয়ান রেলৱেজনা বন্দে ভারত ট্রেনশিং মফমদুদা থাজীন্দুনা পেসেঞ্জরশিং হোন্দোরকপগী থবক্তা মতেং পাংশিল্লি।