ৱারল্ড এনভাইরনমেন্ট দে, ২০২৫ কি থৌরম মনিপুরদসু ওরগনাইজেসন কয়ানা শীন্দুনা পাঙথোকখ্রে, ঈথায় বেরেজদা পন্দুনা লৈবা প্লাষ্টিক্কি পোৎলমশিং শেংদোকপা হৌখ্রে

মালেমগী মফমশিং শীনবা থুংনা চহী খূদিংগী জূন ৫ দা পাঙথোক্তুনা লাক্লিবা ৱারল্ড এনভাইরনমেন্ট দে থৌরম ঙরাঙ মনিপুরদসু ওরগনাইজেসন কয়ানা শীন্দুনা পাঙথোকখ্রে। হন্দক্কি ৱারল্ড এনভাইরনমেন্ট দেগী থৌরম অসীগী থিমদি পুট্টিং এন এন্দ টু প্লাষ্টিক পোল্যুসন হায়বসিনি। নুমিৎ অসীনা লাকপদা লৈকায় লৈকায়গী ওরগনাইজেসন কয়ানা খূৎশম্নরগা উ চারাশিং পাক-সন্না থাখি।

হন্দক্কি ঈচাও মনূঙদা মনিপুরগী তোঙান তোঙানবা তুরেল কয়াদা তাউথরকখিবা অমোৎ- অকায়শিং, মরূওইনা প্লাষ্টিক্কি বোট্টলনচিংবা কয়া মশীঙ থীঙমদনা ঈথায় বেরেজদা পন্দুনা লৈবা মরম্না মীয়ামদা চাউনা খুদোংচাদবশিং মায়োক্নহল্লক্লি। বেরেজ অসীদা চীঙমূক ৱাংনা প্লাষ্টিক্কি পোৎলমশিং, বোট্টলনচিংবা পৈখৎলকপা অসীনা মরম ওইরগা মনিপুর তুরেলগী ঈচেল কা হেন্না তপথহল্লক্লি।

অসীগুম্বা প্লাষ্টিক্কি পোৎলমশিং অসী মথঙ-মথঙ ঈশীংনা চেন্থখিবদগী অতৈ অচৌবা ঈপাকশিং অমসুং সমুদ্রদা ঈতীল্লুরবা মতমদসু মালেম অসীগী মহৌশাগী খলদা য়াম্না চাউনা অকায়বা খুদোংচাদবা, মীওইবা খুন্নাইগী হকশেলদা খুদোংথীনিঙায় ওইহনগদবা কয়া অদূ য়েংলগা ঈথায় য়ূথ ক্লব অমসুং ঈথায় নূপীমচা এসোসিয়েসন অনীনা খূৎশম্নরগা ঈথায় বেরেজদা পন্দুনা লৈরিবা য়াম্লবা প্লাষ্টিক বোট্টলশিং অদূ লৌথোক্তুনা শেংদোকপগী থবক চত্থবা হৌখ্রে। বোট্টলশিং অদূ অসূক্কি মতীক মশীঙ য়াম্মনখিবনা নোংমা-নীনীখক্তদা মপূঙফানা শেংদোকপা ঙম্লোইদৌরি হায়না ঈথায় য়ূথ ক্লবকি সেক্রেটরি নিংথৌজম মঙ্গিজাউনা ফোঙদোকখি। য়ামদ্রবদা নুমিৎ তরানিরোম চঙখিগনি হায়না মহাক্না মখা তাখি।