জেনিমস হোস্পিটাল ঈশীং থূমজীল্লকপদগী রুটিন ওপরেসন চত্থবগী থবক-থৌরমশিং লেপখ্রে, অনাবা মীওইশিং ময়ূমদা চৎনবা হৌখ্রে

মনিপুরদা হৌখিবা চয়োল অমা খরা হেল্লকপা মতমসিদা অহিঙ-নুংথিল নাইদনা অকনবা নোং হৈথরকখিবদগী মরূওইবা তুরেল কয়াগী লৌনম্বাল কায়বা, লৈরায় নমথবা অমসুং ঈশীং পাথোক্তুনা মীয়াম লৈনরিবা এরিয়াশিংদা চেন্সীল্লকপদগী মনিপুরগী চীঙ অমসুং তম্পাক্কি অয়াম্বা মফমশিং খুন্তাক-লান্সিবগা মান্নরে। য়ূম ৯০০ লোম মাঙ- তাক্লে, শা-ষন, য়ূমদা য়োকপা ঙানূ-য়েন, ওক, হুই, হামেঙনচিংবা কয়ামরুম শিবা অমসুং মাঙখিবগী থৌওংশিং মায়োক্নরগা লৈরি।

জৱাহরলাল নেহরু ইন্সটিট্যুট ওফ মেদিকেল সাইন্সেস (জেনিমস) কমপ্লেক্স অমসুং হোস্পিটাল অসীগী মনূঙদা ঈচাও অসীগী ঈশীং চঙশীল্লক্তুনা থূমজীল্লকপদগী রুটিন ওপরেসন পূম্নমক মতম কক্তনা খূদক্তগী সস্পেন্দ তৌরে, ঈচাওগী ফীভম ফগৎলক্লবা মতমদা মখা অমূক চত্থগনি হায়না হোস্পিটাল অসীগী মেদিকেল সুপরিন্টেন্দেন্ট প্রোফেসার কে ঐচ লোকেশ্বরনা ঙরাঙ নোটিফিকেসন অমা থোকখ্রে। ইম্ফাল ইষ্টকি খূরায়, হৈঙাঙ অমসুং চেক্কোন এরিয়াশিংনা অতৈদগী হেন্না ঈচাওগী অরুবা ফীভমশিং মায়োক্নরগা লৈরি। ঈম্ফাল তুরেলগী হৌরকফম কাংপোকপি এরিয়াদা কা হেন্না নোং হৈথরকপদগী ইম্ফাল তুরেলগী ঈশীঙগী ঈমায় কা হেন্না ৱাংখৎলকপদগী তোর্বান কায়বা লৈরায় নমথবা অমসুং ঈশীং পাথোক্তুনা মীয়াম খম থেংনা ঈচাওগী অৱাবা মায়োক্নরকখিবনি।

ইম্ফালগী মিনুথোং দা ঙরাং অয়ূক ফাওবদা হায় দেঞ্জর/ফ্লদ লেভেলদগী শুপ্নগী পোইন্ট ৫২৫ খক হন্থনা লৈখি হায়না ফ্লদ কন্ট্রোল সেলনা পাউ পীরকখি।লিলোং এরিয়াদদি ইম্ফাল তুরেলগী ঈমায়গী থাক অসী হায় ফ্লদ লেভেলগী মথক্তা লৈখি হায়রি। নম্বুল তুরেলসু অকিবা ফংনা ঈমায় ৱাংখৎলক্লি। ঈরিল তুরেলসু খুদোংথীবা য়াবা থাক্কি মথক্তা চেল্লি।