এম পি সি সিনা সংবিধান বচাও মীফমগা লোয়ননা রেল্লি পাঙথোকখ্রে

মনিপুর প্রদেস কংগ্রেস কম্মিটি (এম পি সি সি) বিষ্ণুপুর দিষ্ট্রিক্ট না শীন্দুনা চৎলিবা মে থা অসিগী তরেত্তা সংবিধান বচাও হায়না মিংথোনবা রেল্লিগা লোয়ননা অচৌবা মীফম অমা পাঙথোকখ্রে। থৌরমদুদা এম পি সি সিগী প্রসিদেন্ট অমসুং কংগ্রেসকি এম এল এ কৈশাম মেঘচন্দ্র, সেনিয়র স্পোক্সপর্সন এন ভুপেন্দ্র, এম পি সি সিগী ভাইস প্রসিদেন্টশিং- হরেশ্বর গোশ্বামি অমসুং বিদ্যাপটি সেঞ্জম, জেনরেল সেক্রেটরিশিং-  ৱাহিদুর রাহমান অমসুং এস জিটেন, এম পি সি সিগী লিগেল দিপার্টমেন্টকি কনভিনর- ইন-চার্জ লাইতোঞ্জম ব্রোজেন অমদি এম পি সি সি বিষ্ণুপুর দিষ্ট্রিক্টকি থৌপুবা কয়ামরুমসু মীয়ামগা লোয়ননা শরুক য়াখি।

বিষ্ণুপুর দিষ্ট্রিক্টকি কৈনৌ থোংখোংদা লৈরিবা পব্লিক হোলদা অচৌবা মীফম অদূ পাঙথোকপদা শরুক য়াখিবা এম পি সি সিগী প্রসিদেন্ট কৈশাম মেঘচন্দ্রনা থৌরমদুদা হায়, ভার্টিয়া জনটা পার্টিনা সেন্টর অমসুং মনিপুরদা লৈঙাক পায়রকখিবা মীকূপ্তগী লৈবাক অসী কাং-খোং চাইরে। হৌজিক লৈবাক অসী চাওখৎ মায়কৈদা মনীংলোমদা হন্দুনা চৎলে। বি জে পি লৈঙাক্না সধারন মীয়ামগী পুন্সি অমসুং লন-থুম ঙাক-শেনবা ঙমদবতা নত্তনা ইন্দিয়াগী সংবিধান ঙাক্তুনা, কন্দুনা থম্বা ঙমদ্রে হায়খি।

য়ূমথঙনরিবা লৈবাকশিংগা অফবা মরী থম্বগী মহুত্তা ঙসিদি লৈবাক অসী য়েক্নবনা লাঙ্গোয় চল্লক্লি। পূম্নমক অসীদগী কঞ্জনবা সংবিধান কলহৌদবা য়াদে হায়বা ৱাখল্লোন্দা এম পি সি সিনা রেল্লি অমসুং মীফম পাঙথোকপনি হায়না মেঘচন্দ্র না ফোঙদোকখি। ইন্দিয়াবু মালেমগী থাক্তা সুপর পৱার ওইহনবা ঙমগদবদি রাহুল গান্ধীগী লুচীঙ মখাদনি হায়খি।