স্পিকর সৈত্যবর্তা না মনিপুরগী গভর্নর অজয় কুমার ভাল্লাগা ঙরাং নুংথিল উনদুনা ৱারী শান্নখ্রে, লৈঙাক শেম্ননবগী মতাংদা খন্নরমগনি থাজনরি

মনিপুর লেজিসলেটিব এসেমব্লিগী স্পিকর থোকচোম সৈত্যবর্তা না ঙরাং নুংথিল মনিপুরগী গভর্নর অজয় কুমার ভাল্লাগা রাজ ভবন্দা উনদুনা ৱারী শান্নখ্রে। মীয়ামগী অনৌবা লৈঙাক অমা শেম্নবগী মতাংদা খন্ন- নৈনরম্বা য়াই হায়না মীয়াম্না থাজনরি। হৌখিবা এপ্রিল ২৯ দা ৱাংজিং-তেন্থা এ সিগী এম এল এ পাউনম ব্রোজেন, উরিপোক এ সিগী এম এল এ কে ঐচ রঘুমনি অমদি হীয়াংলম এ সিগী এম এল এ দা. য়ূম্নাম রাধেশ্যাম য়াওনা দিল্লিদা চত্তুনা মনিপুরদা অনৌবা মীয়ামগী ওইবা লৈঙাক অমা শেমজরগে, মদূগীদমক মথৌ তাবা এম এল এ মশীং শুনা লৈরে অদুগা চিফ মিনিষ্টর ওইনা লৈঙাক লুচিংগদৌরিবা মীশকসু লৈরে হায়বা ৱারোলশিং য়াওরবা চেরোল অমা প্রাইম মিনিষ্টরগী ওফিসতা পীশীনখিবা লৈখ্রে।

য়ুনিয়ন হোম মিনিষ্টরগী ওফিসতসু চপ মান্নবা চেরোল পীশীন্দুনা লৈঙাক শেমজরগে হায়না খঙহনখিবা মতূঙদা স্পিকর সৈত্যবর্তা না ঙরাং নুংথিল মনিপুরগী গভর্নর অজয় কুমার ভাল্লাগা রাজ ভবন্দা উনদুনা ৱারী শান্নখিবা অসী মনিপুরগী হৌজীক লৈরিবা তঙদূ- লৈতাদবা রাজনিটিগী ফীভম অসিদা অহোংবা পুরক্তুনা মীয়ামগী ওইবা লৈঙাক অমা লাক্নবগী লম্বী য়াৎপা ওইগনি হায়বগী থাজবা মীয়ামগী পূক্নীঙ-ৱাখলদা ফাওনরি।

হৌজিক বি জে পিগী এম এল এ ১৩, নেস্নেল পিপলস পার্টি ( এন পি পি) গী এম এল এ ৩, ইন্দিপেন্দেন্ট এম এল এ ২ অমসুং নাগা পিপলস ফ্রন্ট কি এম এল এ ৩না স্পিকর থোকচোম সৈত্যবর্তা দা শৌগৎলি হায়না মশা- মশাগী খূৎয়েক পীদুনা পি এম ও দা লৈঙাক অমা শেমজরগে হায়না চেরোল পীশীল্লুরবনি। মখা তারকপদসু বি জে পিগী এম এল এ খরসু স্পিকর সৈত্যবর্তা দা শৌগৎলক্নবা থৌরাং তৌদুনা লৈরে হায়বগী পাউ লৈরি।