কুকি মিলিটেন্টশিংনা মৈতৈদা লান্দারক্লিবসি লেপত্রিবফাওবা খুল ঙাক্লিবা ঈচাশিং ফাবা পুনবা অমত্তা য়ারোই: ইনমেটশিং

কাইহৌরুবা অমত্তা য়াওদনা, চিন-কুকি- জো কাঙলূপকি মিলিটেন্ট শিংনা মৈতৈ ফূরূপকি মথক্তা চত্থরক্লিবা লান অসী লেপত্রিফাওবা সেন্ট্রেল সেক্যুরিটি ফোর্স অমসুং মনিপুর পুলিস কম্মান্দোশিংনা মৈতৈগী খুল ঙাক্লিবা ঈচাশিং ফাবা, পুনবা, হাৎপা অমত্তা য়াবা ঙম্লোই হায়না ঙরাং শীঙজমৈ অকাম্পাৎ তা লৈরিবা আইদিয়েল কল্লেজদা হাংবা রিলিফ কেম্পতা চঙজফম লৌদুনা লৈরিবা, মোরেদগী লাঞ্জেন্নরক্লবা ইনমেটশিংনা অকনবা খোঙজঙ চঙশীন্দুনা প্রোটেষ্ট তৌখ্রে।

সেক্যুরিটি ফোর্স পার্সনেলশিংনা মৈতৈগী খুল ঙাক্লিবা ঈচাশিংদা টারগেট তৌগদবা নত্তে, মনিপুরগী ঙমখৈ অমসুং অপূনবগী শক্তম থুগাইনবা হীঙশা চত্থরক্লিবা কুকি মিলিটেন্ট শিং তকথোকউ হায়না থাবা প্লেকার্দ শিং পায়দুনা অকনবা প্রোটেষ্ট তৌখি। হৌখিবা কুমশিং ২০২৩ গী মে অহুমদগী ফোরেন্নর ইম্মিগ্ৰেন্ট ওইরিবা কুকি মিলিটেন্টশিংনা চত্থরক্লিবা হীঙশাগী ঈরাং অসিদা মীচম-মীয়ামগী পুন্সি কন্ননবা অমসুং মীয়ামগী লন-থুম ঙাক্ননবা থৌগল তৌরিবা, মনিপুরগী শক্তম কন্ননবা হোৎনরিবা ভিল্লেজ ভল্লন্টিয়রশিং অসী লৈরমদ্রবদি মীয়ামগী পুন্সি হেন্না খুদোংথীনিঙায় ওইরম্বা য়ারিবনি হায়না মোরেদগী ঈরাং অসিদা লাঞ্জেল্লক্তুনা অকাম্পাৎ কল্লেজদা হাংবা রিলিফ কেম্পতা লৈরিবা ইনমেটশিংগী মরক্তগী সান্টি না ফোঙদোকখি।

মনিপুরদা এন আর সি খূদক্তগী চৎনহল্লু, সেপরেট এদমিনিষ্ট্রেসন থম্বা য়ারোই, খুলঙাকপা অমত্তা ফাবা য়ারোই, আই দি পিশিং মশা-মশাগী হান্নগী লৈফমশিংদা অমূক হন্না খুন্দা- লৈতাহল্লু হায়বা খোল্লাউশিং লাউখি।খোঙজঙ অদূ কম্মিটি ওন প্রোটেক্সন ওফ মৈতৈ ভিক্তিমস, মোরেনা শীন্দূনা চত্থখিবনি।