‘মনিপুর কি বাট’ য়ানিংদবগী পেনেল দিস্কসন পাঙথোকখ্রে

ন্যু দিল্লিদা থা অসিগী ১৮ দা পাঙথোকপা  ‘মনিপুর কি বাট’, হায়বা খন্ন- নৈনবগী থৌরম অমদা মনিপুরদা থোক্লিবা, কুকি-জো কাঙলূপকি মিলিটেন্টশিংনা কাইহৌরক্লিবা হীঙশাগী শাথিরবা ঈরাঙ অসীবু জষ্টিফাই তৌবগুম্বা ৱাঙাঙ-শঙাং কয়ামরুম শীজিন্নদুনা, য়াম্না মেচ্যোর ওইদবা অমসুং মনূঙ হঞ্জিন্না নৈনদবা মীওই খরনা ফোঙদোকখিবা ৱাফম কয়া অদূনা মনিপুরগী ঈরাঙ অসীবু মালেমগী কম্যুনিটিনা য়াম্না ওন্ন-তৈনবা মায়কৈ অমরোমদা লৌহন্ননবা হোৎনখিবদু শেমদোক্তুনা, অশেঙবা অচূম্বা পূম্নমক্তু মালেমগী মীয়ামদা অমূক হন্না ভাব তাহন্দুনা খঙহন্ননবা পান্দমদা ঙরাং কো-ওর্দিনেটিং কম্মিটি ওন মনিপুর ইন্টিগ্ৰিটি (কোকোমি) না শীন্দুনা “এ রিব্যুটেল টু মনিপুর কি বাট”, হায়না মিংথোনবা পেনেল দিস্কসন অমা পাঙথোকখ্রে।

ইম্ফালগী ক্লাসিক হোটেলদা পাঙথোকখিবা লাইব পেনেল দিস্কসন অদুদা হান্নগী আই এ এস ওফিসার আর কে নিমাই, দাক্তর হোমেন থাংজম, দি এম য়ুনিভর্সিটিগী এসোসিয়েট প্রোফেসার দাক্তর নোনি অরাম্বম, কোকোমিগী কনভিনর খূরায়জম অথৌবা, হিষ্টোরিয়ন দা. মালেম নিংথৌজা, মসাদকি হান্নগী প্রসিদেন্ট মিরাজ সহা কোরিনা প্রেসিদিয়ম মেম্বরশিং ওইনা শরুক য়াখি। মনিপুর কি বাট হায়বা খন্ন- নৈনবগী থৌরম অমা ন্যু দিল্লিদা পাঙথোকখিবা থৌরম অদুদা মনিপুরগী থোক্লিবা হীঙশাগী ঈরাঙ অসী, লমদম অসীগী লৈরিবা য়েলহৌমীশিংদা মপান লৈবাকশিংদগী আইন কায়বা মওংদা লোন্না চঙলকখিবা কুকি-জো কাঙলূপকি টেরোরিষ্টশিংনা ইন্দিয়াগী ষ্টেট অমা ওইরিবা মনিপুরগী টেরিটোরিয়েল ইন্টিগ্ৰিটি থুগাইনবা হোৎনরক্লিবনি হায়বা অমত্তা খঙদবা মীওই খরনা ঈরাঙ অসিগী মরমদা দিস্কসন চত্থখিবদু মতীকচাবা দন্দি পীফম থোকপনি হায়বগী ৱাখল্লোন্দা পেনেল দিস্কসন অদূ পাঙথোকখিবনি হায়রি।

অরানবা পাউ শন্দোক্তুনা মনিপুরগী ঈরাঙ অসীবু লান্না উহন্ননবা হোৎনরক্লিবা মীওইশিং ভাব তাহন্দুনা চুমথোক্ননবা মতম পূম্নমক্তা শেম শাদুনা লৈরি হায়না কোকোমিগী কনভিনর খূরাইজম অথৌবনা থৌরম অদুদা ফোঙদোকখি।