চহী শুদ্রিবা অঙাঙশিং গারি থৌদুনা লম্বীদা থাদোকপিরক্কনু: দি সি থৌবাল

চহী শুদ্রিবা অঙাংশিংদা মমা-মপা ওইবশিংনা গারি মচা অমসুং গারি অচৌবনচিংবা পীদুনা লম্বী-শোরোক্তা থাদোকপিরক্কনু, লম্বীদা চত্থোক-চৎশিন তৌরিবশিংনা ঙাকমিন্নগদবা নিয়ম-নিতিশিং লৈবাক অসীগী মোটোর ভেহিকলগা মরী লৈনবা গাইদলাইনশিংদা ময়েক শেংনা ইদুনা লৈরি। গাইদলাইন ঙাক্তবশিংদি চৈরাক ফংনিঙাই ওই হায়না থৌবাল দিষ্ট্রিক্টকি দিপ্যুটি কম্মিস্নার অহন্থেম সুভাসনা ফোঙদোকখ্রে। চহী খূদিংগী লৈবাক অসীগী ওইনা জনুয়ারি অমদগী কুন্থরামাথোই ফাওবা থাবূম অমা চূপ্না নেস্নেল রোদ সেফটি মন্থ পাঙথোক্তুনা লাক্লি। থৌবাল দিষ্ট্রিক্ট কি ওইনসু থৌরম অসী জানুয়ারি অমদগী ৩১ ফাওবা পাঙথোকখি। ঙরাং রোদ সেফটি মন্থ মপূঙফানা পাঙথোকখিবগী লোইশিনবা থৌরমদা ৱা ঙাঙবদা দিপ্যুটি কম্মিস্নার অহন্থেম সুভাসনা ৱাফম অসী ফোঙদোকখিবনি।

মমা মপা ওইবশিংনা গারি মচা পীদুনা মচাশিং লম্বী- শোরোক্তা পঙথা থাদোরকপগী হৈনবী অসী তোকপিরো। থৌওং অসীনা লম্বীগী এক্সিদেন্ট মশীঙ হেঙ্গৎহন্নবগী মরু ওইবা মরম অমা ওইহল্লি হায়না দি সিনা ফোঙদোকখি। ইন্দিয়ান রেদ ক্রোস সোসাইটি অমসুং দিষ্ট্রিক্ট এদমিনিষ্ট্রেসন থৌবালনা খূৎশম্নরগা থাবূম অমা চূপ্না নেস্নেল রোদ সেফটি মন্থ পাঙথোক্তুনা লাকখিবনি। ঙরাং থৌরম লোইশিনবা নুমিত্তসু থৌবাল মেলা গ্ৰাউন্দ, য়াইরিপোক,  ৱাংজিং অমসুং লিলোংদা রোদ সেফটিগী মতাংদা মীয়ামদা এৱেরনেস পীদুনা ৱাখল তামিন্নবগী থৌরমশিং পাঙথোকখি।

রোদ সেফটি মন্থ থৌরম পাঙথোক্লিঙৈ মনূঙদা থৌবাল দিষ্ট্রিক্ট পুলিশ, ট্রান্সপোর্ট দিপার্টমেন্ট অমসুং মোটোর ভেহিকল দিপার্টমেন্ট খূৎশম্নদুনা নিয়মগী ৱাংমদা চহী শুদনা গারি থৌরকপশিং অমসুং কাঙলোন চুমদনা গারি থৌরকপশিং ই-চল্লান কক্তুনা লূপা লাখ ১৫ হেন্না খোমগৎখি হায়না সুভাসনা ফোঙদোকখি।