বিষ্ণুপুর দিষ্ট্রিক্ট কি ওইনা ৩৬ শুবা নেস্নেল রোদ সেফটি মন্থ দিপ্যুটি কম্মিস্নারনা লমথাখ্রে

পর্ভা (ক্যের) হায়রিবা থিম অসীগী মখাদা বিষ্ণুপুর দিষ্ট্রিক্ট কি ওইনা ৩৬শুবা নেস্নেল রোদ সেফটি মন্থ দিষ্ট্রিক্ট অসীগী দেপ্যুটি কম্মিস্নার ওইনা লৈরিবা লৌরেম্বম বিক্রমনা ঙরাং লমথাদুনা হৌদোকখ্রে। দিষ্ট্রিক্ট অসীগী মিনি সেক্রেটরিয়েট্টা থৌরম অদূ হৌদোকখিবনি। প্রোগ্রাম অদু বিষ্ণুপুর দিষ্ট্রিক্ট ট্রান্সপোর্ট ওফিসনা মপূঙ ওইবা থৌদাং লৌদুনা, এস পি ওফিস বিষ্ণুপুর অমসুং দিষ্ট্রিক্ট অসীগী চিফ মেদিকেল ওফিসকা খূৎশম্নরগা শীনবনি। দিষ্ট্রিক্ট এদমিনিষ্ট্রেসন বিষ্ণুপুরগী সুপরভিজন মখাদা পাঙথোকখিবা থৌরম অসীগী মনূঙদা রোদ সেফটি প্রমোট তৌননবা মীৎয়েংদা তোঙান তোঙানবা থবক-থৌরম কয়া পায়খৎকদৌরি।

মখোয়শিং অদূগী মনূঙ চন্না রোদ সেফটি এনফোর্সমেন্ট দ্রাইভ, স্কুল রোদ সেফটি এৱের্নেস কেম্পেইনশিং, ক্বিজ অমদি দ্রোইং কম্পিটিসনশিং পাঙথোকপা, মীয়াম তিনবা মফমশিংদা পব্লিক  এৱের্নেস কেম্পেইনশিং চত্থবা, পোষ্টর কেম্পেইনশিং লোয়ননা হীট- এন্দ- রন মোটোর কম্পেন্সেসন স্কিমগী মতাঙদা মীয়াম পূন্না খঙমিন্নবগী থৌরমশিংসু পাঙথোক্কদৌরি। গারী থৌবদা লৌখৎকদবা চেকশীন থৌরাংশিং অমসুং থৌরিবা মী অমদি মীয়ামদা অশোয়- অঙাম থোকহন্দনবা ঙাক্কদবা নিয়ম-নিটিশিং পার্টিসিপেন্টশিংদা খঙহন্দুনা দেপ্যুটি কম্মিস্নার না রোদ সেফটি প্লেজ-২০২৫ ৱাশক লৌমিন্নখি।

চক্কা অনী পানবা গারি থৌবদা হেলমেট শীজিন্ননবা, সিট বেল্ট শীজীন্নগদবনি হায়বা ৱাশক, গারি থৌবদা মোবাইল ফোন শীজীন্নবা তোক্নবা, দ্রগ অমসুং য়ু শীজীন্নরগা গারি থৌদবা, লম্বীদা খোঙনা চৎলিবশিংগী রাইট মশক খঙনা মখোয়দা অশোক- অপন থোকহন্দনবা ঙাক্কদবা নিয়ম- নিটিশিং পূন্না নৈনদুনা খঙমিন্নবনা থৌরম হৌদোকপা অদূগী মরূওইবা শক্তম অমা ওইখি।