মনিপুর লেজিসলেটিভ এসেমব্লিগী এম এল এ ওইনা লৈরিবা কুকি-জো কাঙলূপকি মীওই ১০ না ষ্টেট অসীদগী কুকিশিংগীদমক লম খাইদোক্লগা সেপরেট এদমিনিষ্ট্রেসন অমা লেজিসলেচর য়াওনা পীয়ূ হায়বা দিমান্দ তৌদুনা লাক্লিবদু কন্সীলহনবা ওইনা থা অসীগী ১০ দা দিল্লিদা লৈরিবা জন্টর মন্টরদা অকনবা প্রোটেষ্ট তৌখ্রে।
মনিপুরদগী কুকি-জো কাঙলূপখক্কি ওইনা তোঙানবা য়ুনিয়ন টেরিটোরি অমা লেজিসলেচর য়াওনা পীয়ূ হায়বা দিমান্দ অসী পীথোক্লবা মতমদুদা হৌজিক ষ্টেট অসীদা মায়োক্নরগা লৈরিবা হীংশাগী ঈরাঙ অসী লোইশিনবা ঙমগনি। মদূ নত্রিমখৈ ঈরাঙ অসী লোইশিনবা নাইগদবা লৈত্রি হায়বা ৱাফম এম এল এ তরা অসীনা ফোঙদোকখি।
সিট- ইন-প্রোটেষ্ট অদূ চত্থরবা মতূংদা এম এল এ ১০ অসীগী মায়কৈদগী পূন্না সাইন তৌদুনা প্রাইম মিনিষ্টর নরেন্দ্র মোদিদা এদ্রেস তৌদুনা মেমোরেন্দম অমসু পীশিনখি।মমনিপুরদগী লম খাইদোক্লগা কুকি-জো কাঙলূপকি সেপরেট এদমিনিষ্ট্রেসন অমা লেজিসলেচর য়াওনা পীবা হায়বসিনা হৌজিক ষ্টেট অসীদা মায়োক্নরগা লৈরিবা হীংশা অসী লোইশিন্নবগী অমত্তা ঙায়রবা লম্বীনি হায়বসি প্রাইম মিনিষ্টর অমদি সেন্টর লৈঙাক্না খঙজিনবিনবা ৱাফম মেমোরেন্দম অদুদা ময়েক শেংনা ফোঙদোকখি হায়রি।