লীতান এরিয়াদা নৌনা অমুক ঈরাং থোক্লে, য়ূম অনী মৈ থারম্লে, সেক্যুরিটিগী থৌরাং হেন্না কনখৎহল্লে

চৎলিবা ফেব্রুয়ারি থা অসীগী তরেত্তা ঊখ্রূল দিষ্ট্রিক্ট কি লীতান শারৈখোং ভিল্লেজদা তাঙ্খুল অমসুং কুকি কাঙলূপ অনীগী মরক্তা খঙহৌদনা, থৌদোক অমদগী উংখৎনরক্তুনা খৎন-চৈনবগী থৌদোক অমা থোক্লক্তুনা কাঙলূপ অনীমক্কি ওইনা পূন্না য়ূম ৭০ হেন্না মৈ থানদুনা অমাঙ-অতা কয়া মায়োক্নখ্রবা মতূঙদা চৎলিবা থা অসীগী ১২ দসু নৌহৌননা হীঙশাগী ঈরাঙ থোক্লকখ্রে লোয়ননা য়ূম অনী মৈ থাদোক্লম্লে।

লীতান এরিয়াদা হন্দক লেপ্পা লৈতনা ট্রাইবেল কম্যুনিটি অনীগী মরক্তা থোক্লিবা হীঙশাগী ঈরাঙ অসী লাকশীন্ননবা পান্দমদা লৈঙাক্কি মায়কৈদগী সেন্ট্রেল অমসুং ষ্টেটকি মশীং য়াম্লবা সেক্যুরিটি ফোর্স পার্সনেলশিং অহীঙ-নুংথিল খায়দনা দিপ্লোই তৌদুনা অকনবা মওংদা চেকশীন-থৌরাং লৌখৎলিবনি। মসীগীসু মথক্তা মখাতাবা পামদবা থৌদোকশিং থোক্লক্তনবা নুমিৎ মঙানি চূপ্না মোবাইল ইন্টর্নেট কি নেটৱার্ক পূম্নমক এরিয়া অসিখক্তা নত্তনা ঊখ্রূল দিষ্ট্রিক্টকি অতৈ মফম অয়াম্বদসু থিংজিন্দুনা থম্লিবনি।

চৈরকশিদা হৌখিবা ফেব্রুয়ারি ১২ গী অহীঙদা, য়াম্না অঙকপা মওংদা লীতান বজার বোর্দ এরিয়াদা লৈবা য়ূম অনী মৈ থারম্বনি।সেক্যুরিটি ফোর্সনা খূরক হাঙদনা, মীকূপ-নাহুম শেন্নদুনা লৈরিবা মফম অদুদা য়ূম অনী মৈ থারমখিবসি সেক্যুরিটি গী অশোয়বা অমসুং থৌশাদবদগীনি হায়না মায়কৈ কয়াদগী পেন্দবা ফোঙদোক্নরক্লি। কা হেন্না খুদোংথীনিঙায় ওইরবা লীতান এরিয়াগী মোনকোৎ চেপু ভিল্লেজদা হৌজিক সেক্যুরিটি ফোর্সনা কোয়শীন্দুনা লৈবগা লোয়ননা খুঞ্জাশিং য়ূমদগী মপান্দা থোকপা য়াহন্দনা লৈরিবনি।