গ্বালতাবিগী থৌদোক থিজিন্ননবা ইনক্বারি কম্মিটি শেম্লে, মরাল লৈবশিং অহকপা চৈরাক পীগনি: চিফ সেক্রেটরি

হন্দক মে ২০ দা পাউমীশিংগী টিম অমনা সিরুই ফেষ্টিভেল হৌদোকপা থৌরমগী পাউ কভর তৌননবা ঊখ্রূলগী সিরুই তম্না মনিপুর ষ্টেট ট্রান্সপোর্ট কি বস অমদা চৎখিবা খোঙচৎ মনূঙচন্না লম্লাই কেন্দ্রগী গ্বালতাবি য়ৌরকপদা মরিশুবা মহার রেজিমেন্টকি টিম অমনা বস অদুদা মনিপুর হায়না থারিবা ময়েক্তু মূত্থত্রবদি চৎখিবা য়ারোই হায়না অথিংবা থম্লকখিবা থৌওংবু য়ানীঙদবা ফোঙদোক্তুনা মীয়াম্না চঙশীল্লক্লিবা অকনবা ঈরাং অসী লেপ্পিনবা মনিপুরগী চিফ সেক্রেটরি প্রসান্ট কুমারনা আপিল তৌরক্লি।

চিফ সেক্রেটরি অসীনা প্রেসতা থাদোরকপা চেরোল অমগী মতূঙ ইন্না, থৌদোক অদূ খ্বায়দগী লাইবক থীবা অমনি। ষ্টেটকি লৈঙাক অসীনা থৌদোক অদু খ্বায়দগী অকনবা মওংদা কন্দেম তৌই অমসুং য়াম্না লূম্না লৌদুনা থবক লৌখৎপা হৌখ্রে। মীয়ামগী পূক্নিঙ-ৱাখলদা ফাওরিবা পেন্দবা, খোয়শাওনবা, নুঙাইতবা পূম্নমক্তু লৈঙাক্না খঙনা থবক লৌখৎপা হৌরে। মতূঙদসু অসীগুম্বা থৌদোক অমুক হন্না থোকহন্দননবা হোৎনগনি লৈঙাক অসীনা ইন্টিগ্ৰিটি, য়ুনিটি শাগৎনবা অমসুং পব্লিক ওর্দর লৈহন্ননবা হোৎনরিবা অসিদা মীয়াম্নসু মপূঙফানা কোওপরেসন পীবীদুনা ঈঙ-তপ্পা, চাওখৎলবা লমদম অমা ওইহল্লসি হায়রক্লি।

হন্দক্কি থৌদোক অদূ অকক্নবা, অথূবা মতমগী মনূঙদা থিগৎলগা মদূগী রিপোর্ট অমা লৈঙাক্তা পীখৎলক্ননবা ইনক্বারি কম্মিটি অমা শেমখ্রে। কম্মিটি অসিদা কম্মিস্নার হোম অমসুং আই টিগী সেক্রেটরিনচিংবা য়াওরে হায়রক্লি।কম্মিটি অসিগী রিপোর্ট হেক লানখৎলকপগা মরাল লৈরম্বা পার্সনেলশিং অকনবা আইনগী চৈরাক পীহন্ননবা খূদক্তা লৈঙাক অসীনা থবক লৌখৎলগনি হায়নসু চিফ সেক্রেটরিগী চেরোল অসীনা মীয়ামদা খঙহল্লক্লি।