ইমোইনু ঈমাগী ঙা মেলা হপ্তা কাঙজৈবূঙদা পাঙথোক্লি

হৌখিবা চহী অনীগী মতমদগী থংনা-থংননা পাঙথোক্তুনা লাক্লিবা ইমোইনু ফীস ফ্যের কম ফীস ক্রোপ কম্পিটিসন ঙসী ঈমা ইমোইনু লাইরেম্বীগী ঈরাৎ-থৌনিবা নুমিত্তা মহৌশাগুম ইম্ফালগী হপ্তা কাঙজৈবূঙদা পাঙথোক্লি। হন্দক্কি অসীনা মনিপুরদা পাঙথোক্তুনা লাক্লিবা ইমোইনু ফীস ফ্যের কম ফীস ক্রোপ কম্পিটিসন অসীগী অহূম্লক শুবা এদিসন্নি।ঙাগী মেলা অমদি ঙাগী পোত্থোক মখল-মথেল মশীঙ য়াম্না পুথোকপা চাংদম্নবগী থৌরমসিদা ষ্টেট লৈঙাক্না শীন্দুনা ঙা কিলোগ্ৰাম লাখ অমা খরা হেন্না মীয়ামদা অহোঙবা মমলদা ফংহন্ননবা পান্দম থম্লি হায়না ষ্টেট লৈঙাক্কি ফীসরিজ দিপার্টমেন্টগী দিরেক্তর ওইনা লৈরিবা টি ফুল্লেন না ফোঙদোরক্লি।

মৈতৈ-শরেং মরাঙ কায়না মীয়ামদা ফংহন্ননবা থৌরাং তৌখিবগা লোয়ননা কেজি মরি-মঙা লূম্বা শরেং ফাওবা মীয়ামদা ফংহনবা ঙম্লি। মীয়াম্না লাইরেম্বি ঈমা ইমোইনুবু ঈরাৎ-থৌনিজবা নুমিৎ অসীদা ফজবা অমদি অহীংবা মখলগী ঙা পাম্নরিবা কয়া অসী য়েংলগা ষ্টেট ফীসরিজ দিপার্টমেন্টগী মায়কৈদগী মীয়ামগী পূক্নীঙ পেলহন্ননবা থৌরাংশিং মপূঙফানা লৌখৎলক্লি।মনিপুরগী মহৌশাগী ঙা মখলশিং ওইরিবা ঙাতোন, পেঙবা, মৈতৈ-শরেং,শামু,ঙাক্রানচিংবা ঙা মখলশিংসু মীয়ামদা ফংহল্লি।

ঙসী অয়ূক পূঙ ৯ তাবদগী ঙাগী মেলা অসী হৌদোক্তুনা মীয়াম্না অপাম্বা ঙা মখল কয়ামরূম ফংহনবা হৌখ্রে।মীয়াম্নসু ঙা লৈননবা মায়কৈ কয়াদগী হপ্তা কাঙজৈবূঙ তম্না চঙশীন্নরকপগী চাং মীকূপ খূদীঙগী হেঙ্গৎলক্লি। ঈমা কৈথেল ফম্বীশিংগী ওইনা নোংমা-নোংমগী য়োনবা ঙমহৌদবা ঙাশিং অদূ মথঙগী নুমিত্তা য়োঞ্জবা য়াননবা অচৌবা কোল্ড ষ্টোরেজ অমা থম্লগনি হায়না ফীসরিজ দিপার্টমেন্টগী দিরেক্তর অসীনা মখাতানা ফোঙদোরক্লি।