সিরুই ফেষ্টিবেলগী পাউ লৌবা চৎপা পাউমিশিংদা মহার রেজিমেন্ট কি কাঙবূনা ফজদবা থৌওং চত্থরকপদগী পাউ লৌদনা লমখাঙদগী হল্লকখ্রে, অকনবা প্রোটেষ্ট তৌখ্রে

ঙরাং মে ২০ দগী চৎলিবা থা অসীগী ২৪ ফাওবা ঊখ্রূলগী সিরুইদা পাঙথোক্কদৌরিবা সিরুই ফেষ্টিবেলগী মঙাশুবা ইদিসন অসীগী পাউ কভর তৌবা চৎখিবা পাউমীশিংগী টিম অমা তোংখিবা মনিপুর ষ্টেট ট্রান্সপোর্ট কি বস অমা সেনাপতি দিষ্ট্রিক্টকি মনূঙচনবা গ্বালতাবিদা দ্যুটি তাদুনা লৈরম্বা মহার রেজিমেন্টকি লান্মী টিম অমনা চত্থরকখিবা লূজদবা, মীচঙ-মীখায় নাইবা থৌওং অমনা মরম ওইরগা ফেষ্টিভেল পাঙথোক্লিবা মফমদু য়ৌরমদনা গ্বালতাবিদগী খোঙনা ময়ূম মায়কৈরোমদা অমুক হন্নরকখ্রে।

মনিপুরগী গভর্নরনা অথোয়বা মীথূঙলেন ওইদুনা ঙরাং সিরুই লিলি ফেষ্টিভেল অদূ হৌদোকখিবনি। ফেষ্টিভেল অসীগী পাউ কভর তৌনবগীদমক ষ্টেট লৈঙাক্কি দি আই পি আরনা থৌবূ ওইরগা এম এস টিগী বস অমদা তোংদুনা পাউমীশিংগী টিম অদূ ঊখ্রূল তম্না চৎখিবনি। বস অদূনা য়াইঙংপোকপি লান্থোক্লগা গ্বালতাবি য়ৌশিল্লকপদা লম্বীদা দ্যুটি তৌদুনা লৈরম্বা মহার রেজিমেন্টকি টিম অমনা বস অদূ খাম্লবা মতূঙদা এম এস টি হায়না থারিবা ময়েক অদুদা য়াওরিবা “এম “, হায়বদি মনিপুর হায়রিবা ৱাহৈ অদূ চে নপশীন্দুনা খুমজিনগদবনি অদুগা গারীগী নম্বরদা এম এন হায়বদি মনিপুর হায়রিবা অদুসু মূত্থৎলু হায়না অকনবা মওংদা খঙহল্লকপনি হায়রি।

করি মরমগী মনিপুর হায়বা ৱাহৈ অদূ মুত্থৎকদৌরিবনো হায়না পাউমীশিংনা তকখৎলুবদা, সেক্যুরিটি এদভাইজর কুলদিপ সিংহনা নোটিস থোকখিবা লৈখ্রে হায়না মহার রেজিমেন্টকি কাঙবূ অদূনা ফোঙদোরকখি হায়রি। মসিগী মতাংদা অমজু অমসুং ই জি এম গী ইমর্জেন্সি মীফম অমা ঙরাং মনিপুর প্রেস ক্লবতা পাঙথোক্লবা মতূঙদা রেল্লি অমগা লোয়ননা খোঙচৎ পাঙথোক্তুনা গভর্নরদা পেন্দবগী ৱাফম কয়া ফোঙদোক্তুনা মেমোরেন্দম অমা পীখ্রে। পাউমীশিংনা তাল্লিবা দিমান্দ লৈঙাক্না পীদ্রিবফাওবা লৈঙাক্কি পাউ অমত্তা ফোঙদবা হায়নসু ৱারেপ লৌখ্রে। ঙসীসু পাউমীশিংনা শিন্থা লেপ্তুনা মখাতানা খোঙজঙ চঙশীনগদৌরি।